Alumnado con necesidades educativas especiais que require modificacións significativas do currículo en parte ou en todas as áreas ou materias, e que precisa a utilización de recursos moi específicos ou excepcionais, necesidades que non poidan ser atendidas e recursos que non poidan facilitarse dentro das medidas de atención á diversidade dos centros docentes ordinarios.
O alumnado con necesidades educativas especiais pode escolarizarse nun centro de educación especial a tempo completo ou de forma combinada entre dito centro e o seu centro ordinario.
Esta escolarización é diferente a escolarización nos centros ordinarios. Para a escolarización dunha alumna ou alumno con necesidades educativas especiais nun centro de educación especial serán necesarios:
- O ditame de escolarización, realizado polos servizos de orientación.
- O informe do servizo territorial de Inspección Educativa.
- A autorización do Departamento Territorial que corresponda ou, no seu caso, da Dirección Xeral de Ordenación e Innovación educativa. Cando se trate de escolarizacións combinadas, a autorización especificará os tempos que a alumna ou alumno estarán en cada centro.
A escolarización do alumnado para o que se precisou un ditame de escolarización estará suxeita a un proceso de seguimento periódico, por parte da xefatura do Departamento de orientación do centro docente, polo que se revisará nos prazos que se establezan no propio ditame. En todo caso, a revisión da escolarización do alumnado nunha modalidade diferente da ordinaria levarase a cabo, alomenos, ao final de cada curso académico, salvo, en educación infantil, no que a revisión realizarase ao término de cada trimestre do curso escolar.
