Ola, bo día!
Queriamos simplemente informarvos de dúas cousiñas:
1. O vindeiro venres e sábado 12 e 13 de marzo terán lugar as xornadas "Internacionaliza a túa escola. Erasmus+, eTwinning e outras propostas" no que as compañeiras da EOI de Pontevedra, María Fernández, Paula Gómez e Begoña Súarez presentarán o proxecto SBLENDID. Agradecemos que se ofrecesen a presentar e estamos desexando escoitalas. Será moi enriquecedor porque ademais este ano, por primeira vez, teremos asistentes e relatores/as doutras comunidades e doutros países (Escocia e Italia). Achegamos o programa e aproveitamos para dicirvos que o proxecto é de todas as EOI e de todos/as e que, por suposto, tedes absoluta liberdade para presentalo e comentalo nos foros que vexades pertinente. Isto axudará a que o proxecto chegue máis lonxe e enriqueza tamén a outros/as. Se o facedes, agradecemos que informedes ás coordinadoras das vosas EOI e/ou a nós para que poidamos telo en conta para incluír o voso traballo no informe final.
2. Por outra banda, e nesta liña tamén, dicirvos que a plataforma de School Education Gateway, que como sabedes empregamos para buscar cursos (entre outras cousas), ten tamén un newsletter que cada mes dedica a unha temática, e a deste mes é blended learning. Se vos animades a escribir un breve contido, podedes facelo aquí. De novo, é unha maneira de visibilizar o traballo que estamos facendo no SBLENDID e que sirva de utilidade a outros docentes por Europa adiante.
Un saúdo a todos/as!
Alicia Eizaguirre e Diana Pastoriza