O teu guión dun evento de repente galego
Nas actividades anteriores coñecemos formas de organización e espazos escénicos do repente galego, e lemos un guión dun evento escolar protagonizado por mulleres repentistas. O fin dese evento era visualizar a nova xeración de regueifeiras e orixinou un guión que as colocou diante do público nun espectáculo con diferentes dinámicas.
Agora tócache a ti. Nesta tarefa tes que elaborar un pequeno guión para un evento de repentismo que organices co teu alumnado e protagonizado por repentistas da regueifa, o brindo, o freestyle... quen ti queiras.
Parte dun obxectivo educativo, imaxina que artistas ides colocar diante do público, onde, como e escribe un pequeno guión.
O máis importante: como organizas as persoas que van improvisar no escenario, que tipo de dinámicas executan, e o sentido global que queres darlle ao espectáculo.