O proxecto Webs Dinámicas é unha iniciativa posta en marcha no ano 2006 pola administración educativa coa finalidade de dotar aos centros educativos públicos de ensino non universitario de Galicia dun marco común de presenza dixital a través dun conxunto estable de ferramentas web orientadas a reforzar a comunicación institucional, facilitar o acceso á información e aos recursos educativos e impulsar a integración das tecnoloxías da información e da comunicación (TIC) na práctica docente e na xestión ordinaria dos centros.
Ao longo da súa traxectoria, o proxecto evolucionou cara a un modelo de prestación homoxéneo, sostible e baseado en software libre, apoiado nun esquema de acompañamento territorial por parte do persoal asesor Abalar de zona que facilita a adopción e o uso efectivo das ferramentas por parte dos equipos directivos e do profesorado. En termos xerais, o proxecto alíñase cos principios de equidade, accesibilidade, seguridade da información e protección de datos, garantindo que a presenza web dos centros se desenvolva baixo criterios de calidade, continuidade do servizo e cumprimento da normativa vixente, reducindo a carga técnica do profesorado para manter unha presenza web estable e coherente.
En particular, o proxecto persegue os seguintes fins:
- Dispoñer dunha páxina web institucional do centro como canle oficial de información e comunicación coa comunidade educativa, garantindo a publicación ordenada e actualizada de información relevante (organización, documentación, avisos, novidades e recursos).
- Facilitar contornas virtuais de aprendizaxe que complementen e reforcen o ensino presencial, habilitando espazos de comunicación e distribución de materiais didácticos e favorecendo dinámicas de aprendizaxe apoiadas en recursos dixitais.
- Xestionar e difundir contidos multimedia (imaxes, vídeos e outros recursos asociados á vida do centro) de forma estruturada, segura e conforme ás directrices de protección de datos e dereitos de imaxe.
Características do proxecto
- Accesibilidade e facilidade de uso: o modelo de servizo está deseñado para que o profesorado poida xestionar e actualizar os contidos sen necesidade de coñecementos técnicos avanzados, favorecendo a autonomía do centro e a actualización regular da información.
- Acompañamento e soporte territorial: os centros contan co apoio do persoal asesor Abalar de zona da AMTEGA, que proporciona orientación técnica e funcional, resolve dúbidas recorrentes e facilita a posta en marcha, o mantemento e a evolución dos sitios web.
- Equidade dixital e homoxeneización de servizos: ofrecer un conxunto común de aplicacións web e criterios de prestación, contribúe a reducir a fenda dixital entre centros e a garantir un nivel mínimo de servizos dixitais, con independencia do contexto de cada centro.
- Fomento do traballo colaborativo: a existencia dun entorno tecnolóxico compartido favorece a coordinación interna nos centros (equipos, departamentos, coordinación TIC) e facilita o intercambio de boas prácticas entre centros.
- Actualizacións periódicas e seguridade: as aplicacións son obxecto de actualizacións regulares realizadas de forma transparente para os centros, orientadas a incorporar melloras, correccións e medidas de seguridade, garantindo a integridade e dispoñibilidade da información almacenada.
- Cumprimento da normativa de protección de datos: o proxecto articúlase baixo criterios de cumprimento estrito da normativa vixente, incorporando medidas organizativas e técnicas destinadas a protexer a información e a asegurar un uso responsable dos contidos publicados.
- Independencia tecnolóxica: todas as solucións empregadas baséanse en software libre, o que garante a autonomía tecnolóxica, a transparencia do ecosistema e evita a dependencia de provedores privativos, favorecendo unha evolución sostible e controlada do servizo.
