O ser humano sempre estivo interesado polo que acontencía nas noites, que corpos aparecían no firmamento, como era o movemento deses obxectos e como ese espectáculo ía cambiando ao longo do ano e da posición de observación.

Os primeiros instrumentos deseñados e construídos, froito desa curiosidade, permitiron seguir observando o firmamento e definindo estrelas, constelacións, planetas e moito máis.

Os observatorios astronómicos son centros de investigación deseñados para estudar os corpos celestes e os fenómenos producidos no universo. Utilizan instrumentos moi variados como telescopios, antenas e fotómetros para rexistrar a luz e a radiación emitida e tamén para realizar rexistros fotográficos. 

A nosa comunidade posúe zonas naturais privilexiadas para a observación celeste pero tamén conta con varios observatorios astronómicos e centros de interpretación ideais para a observación acompañada de expertos, destacando:

• Centro Astronómico Trevinca (A Veiga). Recoñecido como destino Starlight está situado no concello ourensán da Veiga. Dispón actualmente de oito telescopios. As súas cúpulas albergan un telescopio Ritchey Chretien robótico configurado para realizar tarefas de produción científica completamente automatizadas e dúas refractores apocromáticos de 100 e 150mm que noite tras noite obteñen incribles fotografías de forma autónoma. Dispón alén dun telescopio solar de altísima calidade e catro telescopios Dobson para observación visual. 
  
• Observatorio de Forcarei. Adicado ao estudo das estrelas variábeles e a  fotometrí­a CCD, unha tecnoloxía con cámaras e sensores para medir con alta precisión a intensidade da luz dos obxectos celestes.
• Observatorio Ramón María Aller en Santiago de Compostela. Foi fundado en 1943 polo Dr. D. Ramón María Aller Ulloa como continuación do Observatorio particular que tiña en Lalín (Pontevedra), na actualidade pertence a Universidade de Santiago de Compostela. Da súa instrumentación destaca o refractor doado polo fundador, así como a cámara de interferometría speckle e o fotómetro de ocultacións. En 2003 foi instalado un telescopio de 0,62 m. de apertura.
• Observatorio Cerdedo-Cotobade. Localizado no monte Coirego está xestionado pola Asociación Astronómica Sirio e alberga unha cúpula cun telescopio Meade LX200 ACF de 40 cm de diámetro.

Non perdas a ocasión de visitalos!