Conxunto de medidas levadas a cabo polos monarcas da casa de Borbón durante o século XVIII para limitar e controlar o poder da Igrexa católica no contexto da potenciación do absolutismo real. Os reis reivindicaron fronte á Igrexa as súas regalías (prerrogativas reais), pretensión que xerou importantes conflitos. Finalmente conseguiron impoñer o padroado rexio (o dereito a propoñer os candidatos a ocupar as sedes eclesiásticas vacantes) e o placet(o poder de reter as bulas e provisións da Santa Sede destinadas á Igrexa española), recoñecidos no Concordato de 1753. Neste mesmo ámbito habería que incluír accións como a redución dos poderes do Santo Oficio ou a expulsión dos xesuítas (1767).