Foro de reflexións e debate

As que seguen, son algunhas das preguntas que seguramente todos nos fixemos nestes últimos meses. Invítovos a que abrades os fíos de reflexión e debate sobre estas e/ou outras cuestións que se vos ocorran e as compartades neste foro.

A Covid-19 trouxo asociada unha serie de obstáculos para o labor diario do profesorado e do alumnado. Cales foron as principais dificultades que atopamos nos nosos centros?
No ensino a distancia algúns elementos do presencial desaparecen e outros cobran un novo protagonismo. Cales son os aspectos prioritarios que debemos levar ás nosas aulas para implantar con éxito esta nova modalidade de ensino?
Como docentes, ou temos un mecanismo de enganche do estudante, ou imos ter problemas de abandono escolar no ensino semipresencial. Que metodoloxías docentes consideramos que tiveron un maior impacto para a correcta interacción profesorado-alumnado no proceso de ensino-aprendizaxe?
Como estimamos que debe levarse a cabo a avaliación no ensino semipresencial para lograr que sexa competencial e inclusiva?
A autorregulación da aprendizaxe e a autonomía por parte do alumnado é un factor básico para o éxito no ensino semipresencial. Que estratexias podemos poñer os docentes ao seu dispor para fomentar dita competencia de “aprender a aprender”.
A situación sanitaria vivida afectou de modo especial ao alumnado con NEAE e puxo de manifesto a existencia dunha fenda social. Cales son os modos nos que o ensino semipresencial pode contribuír a ofrecer unha formación máis inclusiva e adaptada ás necesidades de cada alumno/a?
O e-learning esixe unha gran coordinación horizontal no centro e unha nova maneira de xestionar o tempo por parte do profesorado, tanto á hora de preparar as clases, como de deseñar as propias tarefas do alumnado. Cales foron os aspectos negativos detectados a nivel de coordinación interna e xestión temporal nos últimos meses e os posibles modos de solventalos no próximo curso?
Por outra banda, cada docente ten o seu propio modo de ensino. Que ferramentas e/ou metodoloxías emerxentes, das que ata o de agora coñecemos, nos gustaría poder levar ás nosas aulas semipresenciais?
Facer un ensino semipresencial de calidade implica un sólido traballo en equipo. Cales foron os mecanismos de coordinación e comunicación interna dos nosos centros máis febles e alternativas para melloralos de cara ao próximo curso académico 2020/2021?
A pandemia en educación é sinónimo de incerteza pero tamén de oportunidade. Que aspectos de mellora educativa temos observado nestes meses e cales queremos levar ao curso 2020/21?

There are no discussion topics yet in this forum