Mans á terra!

A terra que non está nun medio natural en equilibrio ou que non está ben cultivada tende a volverse compacta e dura.

O traballo da terra consiste en removela para romper esa dureza.

Cando a terra está máis mulida é máis adecuada para o desenvolvemento dun solo vivo e fértil.

Isto é así porque a auga e o ar poden circular por ela.

Como xa vimos antes, unha terra ben aireada e húmida favorece que se desenvolva a vida dos microorganismos e pequenos animais tan beneficiosos para o crecemento das plantas.

Ademais o solo brando permite que as raíces das plantas crezan mellor, e xa sabemos o importante que é iso para que poidan captar nutrientes.

É fundamental facer este traballo cando preparamos os bancais para o noso cultivo.

É o traballo máis duro porque xeralmente a terra está dura e compacta e temos que profundar entre 40 e 60 cm. O mellor, cando se prepara a terra por primeira vez é mellor recorrer á maquinaria agrícola.

Poderemos recorrer a algún agricultor ou agricultora da nosa zona ou contratar a algunha empresa para que faga este traballo para a nosa escola.

Como os bancais están pensados para non ter que pisar neles, non teremos que traballar o solo en todo o curso. So o faremos de novo cando comecemos a nova temporada. Nese caso o traballo non é tan duro porque a terra está pouco compactada. Bastará con que usemos a "forca de dobre mango".

Dentro dunha mesma temporada, se cambiamos totalmente o cultivo dun bancal podemos poñer a punto o seu solo. Nese caso faise un traballo máis superficial co rastrelo.

Cando estudamos o solo falamos da importancia da fauna que vive nela para mantelo ben mulido e aireado. É o caso especial das miñocas, grandes colaboradoras nosas, posto que descompoñen a materia orgánica morta e pouquiño a pouquiño removen e airean a terra. ¡Temos que coidalas moito!

Se o precisas volve a lembrar a riqueza de vida que hai no solo. Se xa otes claro segue adiante!