Aula virtual do CPI de Cova Terreña

Nesta ligazón atoparás a enquisa que nos permitirá elaborar o Plan de Lectura, Escritura e Acceso á Información.

Grazas.

Cuestionario sobre hábitos de lectura e usos da biblioteca para o alumnado de Ed. Secundaria do curso 2024-25.

Os sapoconchos máis espelidos da escola volven para presentarnos as novidades da biblioteca: Perrock Holmes, Resuelve el misterio e moito máis!

Mira este vídeo para saber máis: https://youtu.be/gsJ5R0iKVNI

Ademais, tamén se poden consultar as novidades no panel do corredor da biblioteca! Alí atópanse os libros marcados coas cores por idades: vermello (todos os públicos), verde (a partir de 3ºEd. Primaria), amarelo (a partir de 5º de Ed. Primaria) e sen cor (Ed. Secundaria).

Recentemente foi actualizada a base de datos de usuarios da aula virtual do noso centro. Se es un usuario novo ou tes problemas para acceder, ten en conta isto:

• Nome de usuario: nome1.nome2.apelido1apelido2 
• Ten en conta que os ñ serán n e non se empregan os tiles. Exemplo: María José Fernández Mariño sería maria.jose.fernandezmarino
• O teu contrasinal para o primeiro acceso é changeme
• Se xa empregabas a aula virtual o ano pasado, seguramente o teu contrasinal sexa o mesmo que tiñas. Se non podes acceder, proba en primeiro lugar a acceder co contrasinal changeme, e se segues sen poder acceder ponte en contacto con algún profe.

O día 16 de maio inauguramos no noso centro unha exposición sobre os autores e autoras homenaxeados no día das Letras Galegas desde o inicio desta efeméride, ano 1963, até a actualidade realizado polo alumnado de 1º e 2º da ESO.

O 13 de marzo celébrase o Día Mundial Sen Faltas de Ortografía mais a  Brigada Antigrallas Sapoconchil (BAS) considera que un día non chega a nada e, por iso, convoca a II edición do concurso Á caza da gralla ortográfica . Fixádevos ben na vosa contorna, de seguro que atoparedes erros lingüísticos no lugar menos pensado!

https://youtu.be/jrrj5lbM0P4

Para participar no concurso, cómpre enviar un correo coa fotografía a lentinhashouse@gmail.com, achegando:

       - A gralla encontrada e a súa corrección

Cada participante poderá achegar un máximo de dúas fotografías.
A data límite de entrega é o venres 6 de maio ás 12h do mediodía.
Todas as fotografías recibidas que conteñan unha gralla ortográfica comprobada entrarán na urna que estará exposta en Conserxería. O día 9 de maio celebrarase o sorteo para sabermos quen será o afortunado ou afortunada que levará para a casa un fantástico Ebook. Alén diso, todos os participantes recibirán un pequeno agasallo pola captura dun cazapo lingüístico.
 
Boa e proveitosa caza!

Disque o tempo anda revirado e tolo de todo... por mor do que os nosos sapoconchos lectores vos piden axuda para que lles axudedes a identificar fenómenos meteorolóxicos mediante unha fotografía e un pareado, en lingua galega, que o explique".

 

  

Aquí vos deixamos as bases deste novo concurso para toda a comunidade educativa:
Para conmemorar o Día Mundial da Meteoroloxía, o 23 de marzo, propoñemos un concurso fotográfico sobre un fenómeno meteorolóxico.

Para participar no concurso, é necesario enviar un correo a meteocova@gmail.com, achegando:

• Nome da/o participante e curso.
• A fotografía inédita e propia.
• Un pareado que acompañe e explique a fotografía (estrofa formada por dous versos que riman) en galego.

Cada participante poderá achegar un máximo de dúas fotografías.
A data límite de entrega é o venres 8 de abril ás 12h do mediodía.
Estableceranse 5 categorías de premiados por nivel educativo e unha categoría de profesorado e persoal non docente, podendo quedar deserto algún premio:

• Infantil

• Primaria:

  • 1º, 2º e 3º
  • 4º, 5º e 6º
• Secundaria:
  • 1º e 2º
  • 3º e 4º

A entrega de premios será efectuada á volta de Semana Santa.

Entroido larafuzán, comiches a chicha e deixaches o pan e mais un novo concurso da Biblioteca!!!

Entre máscaras, disfraces, bailes e moitas sobremesas soborosas (mmmmm...), deixámosvos unha nova entrega dos nosos sapoconchos máis festeiros, nesta ocasión na compaña de dous novos amigos, a Nanci Tanxugueira e mais Fofinho, o animal de estimação do alumnado de lingua portuguesa do centro.

Quen ousa participar neste reto que vos propoñen Lentiña, Cova e Terreña? Só tedes que adiviñar de que catro personaxes do Entroido tradicional galego van vestidas Lentiña, Cova, Terreña e mais un dos novos amigos, Fofinho.

O xoves 3 de marzo atoparedes a urna en Conserxería para poderdes participar.

Agardamos as vosas respostas, mentres imos rillando marruchos a fartar! 

Hoxe conmemoramos o Día da NON VIOLENCIA e da PAZ cun vídeo que contén unha performance da canción "Móvete" de Paco Nogueiras. Podedes visualizar a montaxe nos ficheiros adxuntos que acompañan a esta publicación.

Desexamos que pasedes un día pacífico e harmonioso e que gocedes desta pequena contribución que preparou o equipo da Biblioteca.

E como canta John Lennon "Imagine all the people living life in peace"

    

Coa chegada do Nadal, os nosos sapoconchos lectores reciben unha visita moi especial: o Apalparuga!

Lentiña, Cova, Terreña e todo o equipo da Biblioteca desexámosvos un bo Nadal!