A Escola comeza a súa andaina o 15 de xaneiro de 1979 nas instalacións do mosteiro de Poio, dependente do Ministerio de Cultura. O primeiro curso arrinca cunha matrícula de 29 prazas.
En 1982 pasa a depender da Deputación de Pontevedra e a partir do ano 2000 iníciase un novo proxecto con instalacións propias. O 26.000 m² sobre os que se vai a realizar a construción cédeos a Comunidade de Montes de San Salvador, con achegas das consellerías de Industria e Cultura da Xunta de Galicia. O autor do proxecto é o arquitecto Enrique Barreiro Álvarez.
A finalidade da Escola é conservar e promocionar un dos oficios máis antigos e nobres de Galicia, o de cantería, para ensinar a arte de traballar a pedra.
A Escola desenvolve as súas actividades como un taller de traballo artesanal en pedra, no que se combinan ensinos teóricos e prácticos. Os traballos do alumnado e do profesorado van deixando pegada no patrimonio arquitectónico popular de Galicia por todo o mundo: en Fortaleza (Brasil), Maracaibo (Venezuela), Manila (Filipinas), A Paz (Bolivia), Nova York (EUA), Nicaragua, Querétaro (México), Río Galegos, Buenos Aires (Arxentina) ou Montevideo (Uruguai), Chile, Cuba, Alemaña, Francia, Suíza, Romanía e Portugal; así como na realización de hórreos e outras obras que locen en varios puntos de España e do estranxeiro.
O alumnado procede de Galicia, doutras autonomías españolas e do estranxeiro.