Bo día,
Son Francisco Casal e vou a facer de titor/relator neste breve curso que agora comenzamos. Como non me coñecedes, aínda que espero que nuns días nos vexamos as caras aínda que sexa a distancia, cóntovos algunha cousiña sobre min.
Son de Pontevedra, mestre especialista en pedagoxía terapéutica, aínda que tamén traballei de xefe de departamento de orientación e, por misterios do concurso de traslados, como titor en primaria. Fun uns anos director dun CEIP, e agora traballo como asesor nos servizos centrais da Consellería en San Caetano.
A verdade é que non son un experto nin en Moodle, nin en Abalar, moito menos en Webex, pero si que teño bastante experiencia en creación e titorización de cursos en rede e, sobre todo, en integración das tecnoloxías no ensino e na xestión dos centros (aspectos nos que colaboro frecuentemente co CAFI/CFR e co INTEF), e en temas de identidade dixital e uso de internet. Se alguén quere saber algo máis pode pasar por aquí (aínda que non actualizo nin escribo moito por falta de tempo).
Xa que eu non vos coñezo, agradecería que todos/as respondérades a este fío simplemente comentando:
1) Cal é o voso curso/área/especialidade.
2) Cales son as vosas principais inquedanzas ou problemas respecto dos temas a tocar no curso.
3) Calquera outra cousa ou cuestión que queirades comentar ou contar ;-).
Grazas e un saúdo.
PD. Os/as que non tendes unha imaxe subida ao perfil deste aula virtual deberiades facelo: non ten porque ser unha foto da vosa cara, pode ser un debuxo, un personaxe co que vos sentides identificados/as... Non o digo xa por este curso (por min persoalmente non é preciso), senón porque axuda a facer máis humana a relación virtual, facilita identificar rapidamente á persoa usuaria, contribúe a crear vínculo... Seguro que o voso alumnado e as súas familias o agradecería.