Inicio dunha xuntanza en BigBlueButton
Inicio dunha xuntanza en BigBlueButton
Para acceder á sala/sesión que xa temos creada, simplemente deberemos facer clic sobre o título da actividade que se mostra dentro do tema como calquera outro recurso ou contido.
A continuación, veremos que nos indica o estado da sala (dispoñible ou non dispoñible) e no caso de estar dispoñible veremos un botón titulado "Unirse á sesión" que nos permite acceder á sala da videoconferencia.
Primeiramente aparece unha ventá para escoller o acceso con micrófono ou en modo oínte. Habitualmente o profesor utilizará o micrófono durante a xuntanza polo que ao facer clic nesa opción pode solicitarse unha proba de son.
O seu navegador solicitará permiso para o acceso ao micrófono do equipo.
Atención: é fundamental conceder este permiso. Resulta relativamente frecuente esquecerse de activar correctamente o acceso ao micrófono ou á cámara co que non se poderá utilizar ese recurso nese caso. Se non vemos a solicitude de permiso ou, se con posterioridade a acceder, queremos modificar os recursos concedidos podemos facer clic nas iconas que aparecen na barra de navegación, á esquerda da URL, na parte superior da imaxe.
Comprobado o funcionamento do son accédese á sala/sesión que aparece coa pantalla diferenciada cos seguintes elementos.
- Panel principal (1): é o espazo onde aparecerá a presentación e a imaxe dos participantes. Tamén se empregará como área de traballo.
- Panel despregable secundario (2): panel onde ver e editar as parolas ou as notas compartidas, segundo o que se seleccione no menú. Tamén aparece a mensaxe de benvida da sesión.
- Panel de menú e usuarios (3): neste panel podemos escoller a opción que se amosará no panel secundario (2), que pode ser a conversa pública ou as notas compartidas. Tamén está visible a lista de usuarios.
- Opción de parola pública (4): ao seleccionar esta opción o panel secundario (2) amosa as distintas mensaxes públicas dos participantes.
- Notas compartidas: abre as notas e pódense descargar en distintos formatos.
- Usuarios: (6) amosa o número e a identidade dos usuarios, podendo facer distintas accións sobre cada un deles.
- Botóns de multimedia (7): permiten xestionar o uso de audio, vídeo e pantallas compartidas durante a xuntanza.
- Título da sesión (8): nome establecido polo usuario ao crear a sesión ou sala.
- Xestión dos paneis laterais (9): permite amosar ou agochar os paneis laterais (2) e (3).
- Presentación: (10) inicialmente existe unha presentación por defecto pero o usuario pode engadir unha ou varias propias para amosar aos participantes. Tamén se pode ocultar pulsando o botón que está na esquina inferior dereita.
- Botón de accións: (11) permite enviar e xestionar as presentacións, crear unha enquisa, compartir un vídeo externo para compartir cos participantes, seleccionar un usuario ao chou, activar un temporizador/cronómetro, xestionar o deseño e compartir a propia cámara como se dun contido se tratara.
- Menú de opcións: (12): dá acceso a axustes, axuda, saír da xuntanza, etc.
AXUSTES PRINCIPAIS
Mensaxe de benvida: na configuración da sala/sesión establécese a mensaxe que aparece no panel despregable (2). Existe unha mensaxe por defecto por se non se configurou.
Botóns multimedia (7):
- Activar/desactivar micrófono: xestiona o uso do son. É preferible activar o micrófono unicamente cando se interveña na xuntanza, evitando ruídos innecesarios.
- Abandonar/unirse ao son: ao premer nel mantémonos na xuntanza pero sen comunicación sonora cos participantes. Pódese manter a visualización da presentación, dos vídeos, participación en enquisas, conversa pública, etc.
- Activar/desactivar videocámara: controla a compartición da imaxe da cámara propia.
- Compartir pantalla: controla a opción de amosar a propia pantalla ou algunha das ventás abertas no ordenador propio cos demais participantes.
NOTA: É preciso conceder permisos ao navegador cando o solicite para o acceso ao micrófono, á cámara e ás pantallas para poder facer uso destas funcionalidades.