Educación Secundaria para Persoas Adultas

No IES de Vilalonga ofertamos os módulos III e IV das ensinanzas de Educación Secundaria para Persoas Adultas (ESPA). Estas ensinanzas son equivalentes ás ensinanzas de terceiro e cuarto cursos da educación secundaria obrigatoria (ESO).

Ao rematar o módulo final obtense o título de Graduado en ESO, que permite acceder a ciclos formativos de grao medio, bacharelato ou ó mundo laboral. Ademais, existe a opción de obter o título mediante probas libres convocadas oficialmente dúas veces ó ano para quen non poida asistir regularmente ás clases.

Acceso, admisión e matrícula

A ESPA está dirixida a persoas maiores de 18 anos. Poderán acceder aquelas persoas maiores de dezaoito anos ou que os fagan no ano natural en que comeza o curso escolar.

Excepcionalmente, poderán cursar estas ensinanzas persoas maiores de 16 anos que teñan un contrato de traballo ou estean en circunstancias excepcionais que lles impidan realizar estes estudos polo réxime ordinario

O acceso pode realizarse mediante ensinanzas iniciais superadas, validación de estudos previos ou a través dunha Valoración Inicial das Aprendizaxes (VIA)

Cando a persoa que accede a esta oferta educativa teña acreditados estudos realizados, poderá acollerse ás equivalencias recollidas na seguinte ligazón: CADRO DE EQUIVALENCIAS PARA VALIDACIÓNS

1. Prazo de matrícula:

• Entre o 1 e o 8 de setembro de 2025 para o primeiro cuadrimestre. (3º ESO)

• Entre o 8 e o 16 de xaneiro de 2026 para alumnado de nova incorporación ao centro no segundo cuadrimestre. (4º ESO)

Organización e desenvolvemento

Os ámbitos de coñecemento da educación secundaria para persoas adultas incorporan os aspectos básicos das materias da educación secundaria obrigatoria tal como seguen:

a) Ámbito de Comunicación, en que se integrarán os aspectos básicos do currículo referidos ás materias de Lingua Castelá e Literatura, de Lingua Estranxeira e de Lingua Galega e Literatura.

b) Ámbito Social, en que se integrarán os aspectos básicos do currículo referidos ás materias de Xeografía e Historia, e de Educación en Valores Cívicos e Éticos.

c) Ámbito Científico-Tecnolóxico, en que se integrarán os aspectos básicos do currículo referidos ás materias de Física e Química, de Bioloxía e Xeoloxía, de Matemáticas, e de Tecnoloxía e Dixitalización.