Xestión de usuarios e roles

Usuarios e roles. Permisos

Co fin de facilitar a xestión de usuarios en Drupal, os usuarios da plataforma agrúpanse en roles, de xeito que todos os usuarios pertencentes a un determinado rol teñen os mesmos permisos.

Ademais, un mesmo usuario pode pertencer a varios roles, o que proporciona unha gran flexibilidade na asignación de permisos. No caso de pertenza a varios roles, o usuario disporá da suma de todos os permisos concedidos a cada un dos roles que teña asignados.

En Drupal existen dous roles de usuario por defecto denominados usuario autenticado e usuario anónimo, que non se poden eliminar:

• Rol de usuario anónimo, propio do usuario que accede á plataforma sen introducir un nome de usuario e contrasinal. 
• Rol de usuario autenticado: inherente a todos os usuarios que acceden á plataforma a través dunha conta introducindo o seu nome de usuario e contrasinal. 

Os sitios web corporativos do proxecto Webs Dinámicas incorporan a maiores os seguintes roles:

• Administrador: Ten habilitados por defecto todos os permisos dispoñibles na plataforma. Os centros educativos dispoñen dun usuario admin, inicialmente desactivado, pertencente ao rol administrador.
• Xestor: Ten un dobre conxunto de permisos:
  • Por unha banda, pode crear usuarios e asignar roles (agás o rol de administrador).
  • E por outra, pode personalizar o sitio web sen tantas opcións como un usuario do rol administrador.
• Editor principal: Pode crear, modificar ou borrar tanto os seus propios contidos como os contidos xerados por outros usuarios do sitio web. 
• Editor do contido: Unicamente pode crear, modificar ou borrar os seus propios contidos. Só pode publicar en determinados apartados da web, establecidos previamente por un usuario administrador ou xestor do sitio.
• Convivencia: Unicamente os usuarios deste rol poden acceder aos rexistros do punto laranxa, formulario web no que o alumnado pode denunciar casos de acoso escolar. O acceso a estes rexistros é moi restrinxido, xa que se trata de información de carácter confidencial protexida por protección de datos. Normalmente corre a cargo do orientador ou orientadora do centro.

Creación dun novo usuario

A xestión de usuarios realízase desde a ruta Xestionar > Persoas. 

• Despregarase a relación de usuarios do sitio web, con indicación do seu estado (activo/bloqueado), roles asignados, tempo desde que se creou a conta (membro durante) e último acceso á plataforma.
• Premer en +Engadir usuario/a
  • Enderezo de correo electrónico: Especificar unha conta de correo para o usuario (do tipo @edu.xunta.gal)
  • Nome de usuario/a: Debe evitarse o emprego de usuarios xenéricos.
  • Contrasinal: será necesario introducila por duplicado.
  • Estado: Activo (o usuario pode acceder á web). En caso de estar bloqueado, a conta permanecerá suspendida ata que volva a activarse, polo que o usuario non poderá iniciar sesión na plataforma.
  • Roles: Marcar os roles que se asignarán ao usuario creado. Observar que xa aparece marcado por defecto o rol usuario autenticado.
  • Notificar ao/á usuario/a da nova conta: Permite que a plataforma envíe un correo ao enderezo especificado advertindo da creación da conta.
  • Imaxe: Permite subir unha imaxe de avatar para o usuario.
  • Opcións de idioma > Idioma do sitio web: Aínda que cada usuario pode establecer o seu propio idioma no perfil, recoméndase deixar o galego por defecto.
  • Opcións de contacto > Formulario de contacto persoal: Permite habilitar un formulario de contacto persoal para que o resto de usuarios da plataforma podan poñerse en contacto co usuario.
  • Crear nova conta

• O novo usuario será visible a través da ruta Xestionar > Persoas e xa poderá acceder á platafoma.