A LITERATURA DE PREGUERRA

1. A Xeración das Irmandades

Resultado de imagen de irmandades da fala

Coñecemos con este nome a un grupo de escritores que colaboran coas Irmandades da Fala. De entre todos eles, destaca Ramón Cabanillas.

RAMÓN CABANILLAS (Cambados, 1876-1959)

Escritor no que se fusionan:

      • O modernismo de finais do XIX (o gusto polo exótico, polos elementos lendarios, polo sensual...)

      • O compromiso co movemento agrario e o galeguismo.

Cultiva a prosa, pero, especialmente, a poesía e o teatro:

      • Como libro de poemas, podemos destacar No desterro, libro escrito na Habana, cun forte compromiso co movemento agrario.

      • No teatro, podemos destacar dúas obras ó servizo da causa galeguista: Na noite estrelecida, na que fai unha recreación galeguizada da historia do rei Artur, subliñando as orixes celtas de Galicia, e O Mariscal,, que ten como protagonista a Pardo de Cela, nobre que se opuxo ó dominio dos Reis Católicos sobre Galicia.

ACTIVIDADES

Le os textos que seguen e, despois, sitúaos, xustificando a resposta, na súa obra, no galeguismo ou no modernismo. Conta o seu argumento e sinala os seus temas.

A. ¡Irmáns! ¡Irmáns galegos!
¡Desde Ortegal ó Miño
a folla do fouciño
fagamos rebrilar!
Que vexa a Vila podre,
coveira da canalla,
a Aldea que traballa
disposta pra loitar.
Antes de ser escravos,
¡irmáns, irmáns galegos!
que corra a sangre a regos
dende a montaña ó mar.
¡Ergámonos sen medo!
¡Que o lume da toxeira
envolva na fogueira
o pazo señorial!
Xa o fato de caciques
ladróns e herexes fuxe
ó redentor empuxe
da alma rexional.
Antes de ser escravos,
¡irmáns, irmáns galegos!
que corra a sangre a regos
dende a montaña ó val.


B. Nun nimbo lumioso surde o bardo adiviño,
envolveito en brancuras recedentes de liño,
ollos gazos, profundos, longa barba frorida,
cingue a frente coas hedras da coroa druida
e na man, que reloce como un lirio bendito
ten a fouce de ouro do litúrxico rito;
a fouce segadora da mandrágora,
de feitizo e de agoiro dos luares de maio.
É Merlín o profeta, o celta armoricán,
dos silfos e das lumias ollado por irmán,
sabidor dos encantos e os máxicos conxuros,
das virtudes das herbas e dos fados escuros,
que nos craros dos bosques e os baixíos costeiros
deprendeu o diviño lenguaxe dos luceiros;
o bardo das edades, o da segreda ciencia
que a terra fixo súa, impóndolle obediencia
ás ágoas da riada, ós rochedos do cume,
ás nubes da tromenta, á ardentía do lume