Movendo a lingua

Este é o quinto episodio do podcast MOVENDO A LINGUA, que documenta e complementa as actividades desenvolvidas polos equipos de dinamización da lingua galega (EDLG) da EOI de Lugo e do CMUS Xoán Montes de Lugo no marco do proxecto colaborativo sobre música e poesía posto en marcha este curso 2024/2025, dentro do Plan Proxecta+. Neste episodio continuamos compartindo entrevistas coas poetas cuxos poemas foron escollidos na Botica da lingua dos EDLG da EOI de Lugo e do CMUS Xoán Montes de Lugo para as pílulas curativas ou para seren musicados polo profesorado e alumnado do conservatorio. Nesta ocasión, entrevistamos a Eva Teixeiro. O seu poema “Bicos” foi parte das pílulas curativas "para cando sintas a lingua”, e a música que procuraron para el no conservatorio é “Na Eira”, do Gaiteiro de San Xusto, arranxada por Bruno Villamor Gay e Germán Díaz e interpretada polo propio Germán Díaz e José Ramón Saborido. O poema e a música podedes escoitalos ao final do episodio. A entrevista foi realizada na biblioteca escolar da EOI de Lugo e contou coa colaboración de Montse Villar, alumna do centro. Foi editada por José Ramón Saborido, coordinador do EDLG do CMUS Xoán Montes de Lugo.