Radio Rochoteca - A radio da EOI de Lugo

Este é o terceiro episodio do podcast MOVENDO A LINGUA, que documenta e complementa as actividades desenvolvidas polos equipos de dinamización da lingua galega (EDLG) da EOI de Lugo e do CMUS Xoán Montes de Lugo no marco do proxecto colaborativo sobre música e poesía posto en marcha este curso 2024/2025, dentro do Plan Proxecta+. Neste e nos seguintes episodios do podcast compartiremos entrevistas con poetas galegas cuxos poemas foron escollidos na Botica da lingua dos EDLG da EOI de Lugo e do CMUS Xoán Montes de Lugo para as pílulas curativas ou para seren musicados polo profesorado e alumnado do conservatorio. Nesta ocasión, entrevistamos a Pilar Pallarés. O seu poema “Neno palestino con gato despois do bombardeo. Dunha foto de prensa” foi escollido na EOI de Lugo para ser logo musicado no CMUS Xoán Montes de Lugo, e o día 5 de maio púidose escoitar a música composta para el no auditorio municipal Fuxan os Ventos. O poema recitado pola propia Pilar Pallarés e a música pódense escoitar ao final deste episodio. A entrevista foi gravada na biblioteca escolar da EOI de Lugo, grazas á colaboración de Maite Herrero, alumna do centro. Foi editado por José Ramón Saborido, coordinador do EDLG do CMUS Xoán Montes de Lugo.