O xoves 23 de outubro déronse a coñecer as novelas gañadoras da XXIX edición do Premio Literario San Clemente – Rosalía nunha rolda de prensa celebrada no Salón de Claustros do centro. Na modalidade de lingua galega, o xurado outorgoullo o premio á novela Pel de cordeiro, de Ledicia Costas; en lingua castelá, a gañadora foi La península de las casas vacías, de David Uclés, e, en lingua estranxeira, o premio recaeu na novela Misericordia, da autora portuguesa Lídia Jorge.
O Premio conta coa colaboración da Xunta de Galicia a través da Consellería de Educación, Ciencia, Universidades e Formación Profesional e mais da Consellería de Cultura, Lingua e Xuventude. No anuncio ante os medios, participaron o director xeral de Centros e Recursos Humanos da Consellería de Educación, Jesús Manuel Álvarez Bértolo; o secretario xeral de Lingua, Valentín García; a directora do IES Rosalía de Castro, Gemma Paredes, e 6 estudantes do xurado que leron a acta do premio de cada modalidade e presentaron a novela gañadora. Os voceiros do xurado na modalidade de lingua estranxeira, Jairo Barros e Cristina Pérez, do IES Isaac Díaz Pardo, declararon que premiaron a novela Misericordia, de Lídia Jorge, polo “lirismo que atravesa o texto”, polo “retrato da beleza do cotiá que ofrece” e pola “visión renovada sobre os nosos maiores”. Os representantes da novela en lingua castelá, David Dios, do IES 12 de outubro de Ourense, e Natalia Argibay, do IES Rosalía de Castro, gabaron a novela premiada, La península de las casas vacías, de David Uclés, pola “súa ambición de novela total”, así como a súa orixinalidade ao empregar “o realismo máxico” e o “multiperspectivismo para tratar a memoria histórica”. Os voceiros en lingua galega, Diego Rodríguez, do IES Sanxillao (Lugo), e Alba García, do IES Rosalía de Castro, destacaron da obra premiada, Pel de Cordeiro, de Ledicia Costas, a súa “singular estrutura e a súa prosa áxil” que permite “facer de todo o fantástico, verosímil”. E tamén sinalaron que era unha “obra completa” que brindaba un retrato orixinal e necesario das relacións entre mulleres”.
Na rolda de prensa lembrouse a singularidade deste galardón que ten como xurado a alumnado de 2º de bacharelato. Nesta XXIX edición, ademais do noso insitituto, participaron 9 centros máis, tanto de Galicia coma do exterior: O IES Antón Losada Diéguez da Estrada (Pontevedra), o IES 12 de Outubro de Ourense, o IES Isaac Díaz Pardo de Sada (A Coruña), o IES Sanxillao (Lugo), o IES Antonio Fraguas de Santiago, o IES Ramiro de Maeztu de Madrid, o Lycée Saint François Xavier de Vannes (Francia), o Grimmelshausen Gymnasium de Gelnhausen (Alemaña), o Hockerill Anglo European College (Reino Unido).
