Como crear e configurar un curso

Para crear un novo curso debemos ir ao bloque Administración e seleccionar o menú Administración do sitio -> Cursos -> Engadir/Editar cursos:

Tamén poderemos cambiar en calquera momento a configuración xeral do curso que creamos (despois de crear o curso), dende o bloque Administración, en Administración do curso -> Editar a configuración:

Imaxe 1.5.2 Menú Editar a configuración

As opcións de creación e configuración agrúpanse nos seguintes bloques:

• Xeral
• Descrición
• Formato do curso
• Aparencia
• Ficheiros e envíos
• Acceso como convidado
• Grupos
• Renomeado de roles

Poden aparecer algunhas outras opcións pero normalmente estas (as anteriores) son as máis habituais.

Xeral

• Nome completo (do curso)
  Define o nome co que o curso aparece dentro de Moodle.
• Nome curto do curso.
  É o nome co que se identifica ao curso na barra de navegación superior.
• Categoría de cursos.
  Este axuste determina a categoría dentro da que aparecerá clasificado o curso na lista de cursos.
• Visibilidade do curso
  Presenta dúas posibilidades: amosar ou agachar. No caso de elixir a opción de agachar, o curso estará visible unicamente para o profesorado, pero non para o alumnado.
• Data de inicio e de remate do curso
  Determina a partir de que data estará dispoñible este curso e cando deixará de estalo. Se se seleccionou o Formato semanal, esta opción determina como se etiquetará cada sección. A primeira sección empezará na data indicada aquí. Tamén determina dende que momento se empezan a gardar os rexistros de actividade do curso.
• Número de identificación do curso
  É un código interno de Moodle que non debe modificarse sen consultar co administrador.

Descrición

• Resumo do curso
  Espazo para facer unha breve presentación do curso.
• Ficheiros de resumo do curso
  Os ficheiros de resumo do curso (normalmente son imaxes) móstranse na lista de cursos, xunto co resumo.

Formato do curso

• Formato
  Permite escoller a forma de presentar o curso entre formato de actividade única, formato social, formato de temas e formato semanal. O primeiro traballa cunha única actividade ou recurso, o segundo organiza o curso en torno a un único Foro de debate, o terceiro divide o curso en temas ou unidades e o último ordena o curso cronoloxicamente en semanas.
• Número de seccións
  No caso de seleccionar os formatos de temas ou semanal, indica o número de bloques ou seccións do curso. Pode modificarse en calquera momento.
• Seccións agachadas
  Cando haxa seccións agachadas no diagrama de temas, estas pódense mostrar de forma colapsada (indicando ao alumno que existen pero que están pechadas) ou simplemente non mostralas. A primeira opción permite ao alumno saber o número de seccións do curso aínda que estean ocultas.
• Deseño do curso.
  Define a forma na que se mostran os temas, todos nunha mesma páxina, ou cada tema en páxinas diferentes.

Aparencia

• Forzar o tema e o idioma
  Fai que tódolos menús e opcións do curso cambien de aparencia ou se amosen nun idioma determinado (o alumnado non pode cambialo).
• Número de novas
  Determina o número de noticias (mensaxes incluídos no Foro de novas) mostradas no bloque Últimas noticias.
• Amosar o libro de cualificación aos alumnos
  Permite ocultar ao alumno o libro de cualificacións do curso, situado no bloque Administración.
• Amosar os informes de actividade
  En caso afirmativo, o alumno pode consultar o seu informe completo de actividade no curso a través do seu perfil persoal. É o mesmo informe ao que o profesor ten acceso, de cada alumno dende o menú Participantes.

Ficheiros e envíos

• Tamaño máximo de transferencia
  Define o tamaño máximo dos ficheiros que as persoas usuarias poden subir ao curso.

Seguimento de completado

• Activar o seguimento do progreso (para o completado)
  Permite visualizar na páxina principal do curso o progreso das persoas participantes. En cada unha das tarefas defínese o completado da actividade en función dun conxunto de criterios elixibles.

Acceso como convidado

• Permitir o acceso a convidados.
  Debe habilitarse dende Administración-> Administración do curso -> Usuarios -> Métodos de matriculación para que apareza esta opción. En caso afirmativo, calquera persoa usuaria dada de alta en Moodle poderá acceder ao contido do curso, aínda que sen poder participar nas Actividades.
• Contrasinal.
  Se unha persoa quere acceder ao curso como convidado terá que escribir este contrasinal cada vez que desexe acceder. Debe estar activado o método de matriculación de convidados.

Grupos

• Modo de grupo
  Define o modo de grupo do curso. Tódalas actividades que se creen terán por defecto o modo de grupo que se defina aquí. Poderá cambiarse despois dentro da propia actividade.
• Forzar o modo de grupo.
  En caso afirmativo, tódalas actividades créanse co modo de grupo anterior e non se poderán cambiar.
• Agrupamento predeterminado.
  Tódalas actividades e recursos que se creen serán asignados inicialmente ao agrupamento que se seleccione aquí. Despois poderá cambiarse.

Renomeado de roles

Permite substituír o nome co que aparecen os roles de Moodle. Por exemplo, que o/a profesor/a pase a chamarse Titor de maneira que cada vez que se deba mostrar a palabra profesor apareza no seu lugar a palabra Titor.

Etiquetas

Termos que definen ao curso e permiten unha busca no sitio. É conveniente redactalas a partir do acordo do profesorado.