Medusas, anémonas e corais
Aínda que as medusas, as anémonas e os corais presentan formas moi diferentes, teñen en común as seguintes características:
- Teñen o corpo en forma de bolsa, cun só orificio que está rodeado por tentáculos.
- O corpo é brando. Só algúns corais teñen unha coiraza dura.
- Posúen simetría radial.
- A maioría son mariños e viven en mares cálidos.
- Viven fixados ao substrato, agás as medusas, que poden nadar.
- Son carnívoros. Aliméntanse de animais que cazan cos seus tentáculos.
Equinodermos
As estrelas e os ourizos de mar son equinodermos. Estas son as súas características:
- Son mariños.
- Teñen simetría radial.
- Posúen unha protección formada por pezas duras situadas debaixo da pel.
- Os ourizos, ademais de protección interna, teñen pugas.
- Pódense desprazar moi lentamente polo fondo do mar.
Poríferos
As esponxas son poríferos. Son animais moi sinxelos e estas son as súas características:
- O seu corpo ten formas irregulares e non presenta ningún tipo de simetría.
- Teñen o corpo cheo de poros.
- Aliméntanse das substancias que filtran da auga a través dos seus poros.