Drive a car, Patrik Nygren. Licenza CC BY-SA

Quero xogar

Non quero ir ao cole, non quero estudar, nin levantarme cedo, nin cargar con libros ás costas, nin estar sentado 5 horas, nin escoitar falar durante ese tempo a unha soa persoa, nin copiar os enunciados dos exercicios, nin facer deberes, moitos deberes, nin facer exames, nin aprender de memoria, nin andar a golpe de timbre, nin estar calado.

Quero rir, cantar, saltar, crear, tocar, coller, gritar, abrazar, sentir, cantaruxar, pintar, recortar, romper, arranxar, investigar, bailar, abrir e pechar, descubrir, saír, falar, falar, vale, tamén quero escoitar, equivocarme e solucionalo, chorar, crecer, amar.

Quero que me escoites, que me mires, que me sintas, que me contes contos, que me amoses a realidade, que me vexas capaz, que me fagas sentir capaz, que me animes, que me esixas, que me escoites, si, outra vez, que me escoites, que vexas o que fixen, que mo critiques, que mo volvas ver, que me respectes, que me vexas chorar e me preguntes por que, que me digas que non, que me digas que si.

Por que? porque quero aprender. Porque quero xogar.