OUTROS RENDEMENTOS DE CAPITAL MOBILIARIO (art. 25.4 da lei)
INGRESOS ÍNTEGROS
Queda incluído nesta epígrafe calquera outro rendemento de capital mobiliario non incluído nos parágrafos anteriores e, entre outros, os seguintes rendementos, en diñeiro ou en especie:
a) Os procedentes da propiedade intelectual cando o contribuínte non sexa o autor e os procedentes da propiedade industrial que non se encontre afecta a actividades económicas realizadas polo contribuínte.
b) Os procedentes da prestación de asistencia técnica, salvo que a dita prestación teña lugar no ámbito dunha actividade económica.
c) Os procedentes do arrendamento de bens mobles, negocios ou minas, así como os procedentes do subarrendamento percibidos polo subarrendador, que non constitúan actividades económicas.
d) Os procedentes da cesión do dereito á explotación da imaxe ou do consentimento ou autorización para a súa utilización, salvo que a dita cesión teña lugar no ámbito dunha actividade económica.
e) Os rendementos derivados de préstamos concedidos polo contribuínte.
Tamén se incluirán nesta epígrafe no recadro 040 o resto de rendementos de capital mobiliario que se deban incluír na base impoñible xeral, como, por exemplo, a contía dos rendementos derivados da cesión a terceiros de capitais propios procedentes de entidades vinculadas co contribuínte.
RETENCIÓNS
Así mesmo, indicaranse nesta epígrafe as retencións practicadas ou ingresos á conta efectuados sobre os rendementos xerados, cantidades que o programa traslada ao recadro 591 da páxina 16 da declaración.
Xuros de activos financeiros con dereito a bonificación exclusivamente cando procedan de entidades vinculadas co contribuínte.
Indicaranse nas epígrafes correspondentes as retencións efectivamente practicadas e a retención deducible.
O importe das retencións non practicadas efectivamente que, non obstante, teñen a consideración de deducibles da cota será trasladado polo programa ao recadro 588 da páxina 16 da declaración.
GASTOS FISCALMENTE DEDUCIBLES (art. 26.1.b) da lei)
Exclusivamente en caso de rendementos derivados da prestación de asistencia técnica, do arrendamento de bens mobles, negocios ou minas ou de subarrendamentos, serán deducibles dos rendementos íntegros todos os gastos necesarios para a súa obtención e, se é o caso, o importe da deterioración sufrida polos bens ou dereitos de que os ingresos procedan.
Para estes efectos, aplicaranse as mesmas regras previstas para os gastos deducibles dos rendementos de capital inmobiliario. Non será de aplicación o límite establecido para xuros e demais gastos de financiamento e gastos de reparación e conservación.
No caso de rendementos derivados da cesión a terceiros de capitais propios procedentes de entidades vinculadas co contribuínte, poderán deducirse, se é o caso, os gastos de administración e depósito de valores negociables.
REDUCIÓNS (art. 26.2 da lei)
Como regra xeral, os rendementos netos computaranse na súa totalidade, a non ser que lles sexa de aplicación a redución do 40 por 100 cando se trate de rendementos irregulares.
Atención: normalmente a redución deberá consignarse sen signo ningún. Non obstante, cando a redución afecte un rendemento neto negativo consignarase precedida do signo menos (-).