Unicamente se imputará a renda positiva obtida pola entidade non residente que proveña de cada unha das fontes indicadas no artigo 91.2 da Lei do IRPF. Cando a entidade participada sexa residente de países ou territorios cualificados regulamentariamente como paraísos fiscais, presumirase, salvo proba en contrario, que a renda obtida procede das ditas fontes.
En resumo, as fontes de onde han de proceder as rendas positivas que hai que imputar son:
1- RENDAS QUE NON DERIVEN DE ACTIVIDADES EMPRESARIAIS
a) Titularidade de bens inmobles e dereitos reais que recaian sobre estes non afectos a actividades empresariais.
b) Participación en fondos propios de calquera tipo de entidade e cesión a terceiros de capitais propios.
c) Transmisión dos bens e dereitos referidos nas alíneas anteriores, que xeren ganancias e perdas patrimoniais.
Non se imputarán as rendas previstas neste número:
• Cando a suma dos seus importes sexa inferior ao 15 por 100 da renda total ou ao 4 por 100 dos ingresos totais da entidade non residente (ou do conxunto das entidades non residentes pertencentes a un grupo de sociedades no sentido do artigo 42 do Código de comercio).
• Cando procedan de entidades nas que a entidade non residente participe, directa ou indirectamente, en máis do 5 por 100, sempre que esta dirixa e xestione as participacións mediante a correspondente organización de medios materiais e persoais; e os ingresos das entidades das que se obteñan as rendas procedan polo menos no 85 por 100 do exercicio de actividades empresariais.
2- RENDAS DERIVADAS DE ACTIVIDADES EMPRESARIAIS
Só se imputarán rendas positivas provenientes de actividades empresariais cando se trate de actividades crediticias, financeiras, aseguradoras e de prestación de servizos (excepto os directamente relacionados coas actividades de exportación), e sempre que a entidade non residente desenvolva as ditas actividades fundamentalmente con persoas ou entidades vinculadas no sentido do artigo 16 do texto refundido da Lei do imposto sobre sociedades.
Ademais só se incluirá a renda positiva derivada destas actividades que se realicen con persoas ou entidades vinculadas e residentes en territorio español, en canto determinen gastos fiscalmente deducibles para as ditas persoas residentes.