Cando se cumpran determinados requisitos, o rendemento neto das actividades económicas minorarase nas contías seguintes:
- Contribuíntes con rendementos netos de actividades económicas iguais ou inferiores a 9.180 euros: 4.080 euros anuais.
- Contribuíntes con rendementos netos de actividades económicas comprendidos entre 9.180,01 e 13.260 euros: 4.080 euros menos o resultado de multiplicar por 0,35 a diferenza entre o rendemento neto de actividades económicas e 9.180 euros anuais.
- Contribuíntes con rendementos netos de actividades económicas superiores a 13.260 euros ou con rendas, excluídas as exentas, distintas das de actividades económicas superiores a 6.500 euros: 2.652 euros anuais.
Como consecuencia da aplicación desta redución, o saldo resultante non poderá ser negativo.
Discapacitados
Adicionalmente, as persoas con discapacidade que obteñan rendementos netos derivados do exercicio efectivo de actividades económicas poderán minorar o rendemento neto destas en 3.264 euros anuais.
A dita redución será de 7.242 euros anuais, para as persoas con discapacidade que exerzan de forma efectiva unha actividade económica e acrediten necesitar axuda de terceiras persoas ou mobilidade reducida, ou un grao de discapacidade igual ou superior ao 65 por 100.
Como consecuencia da aplicación desta redución, o saldo resultante non poderá ser negativo.
Requisitos
1. O rendemento neto deberá determinarse conforme o método de estimación directa. Non obstante, se se determina conforme a modalidade simplificada do método de estimación directa, a redución será incompatible coa dedución de provisións e gastos de difícil xustificación; neste caso o programa aplicará a contía máis favorable.
2. A totalidade das súas entregas de bens ou prestacións de servizos deben efectuarse a unha única persoa, física ou xurídica, non vinculada nos termos do artigo 16 do texto refundido da Lei do imposto sobre sociedades ou que o contribuínte teña a consideración de traballador autónomo economicamente dependente conforme o disposto no capítulo III do título II da Lei 20/2007, do 11 de xullo, do Estatuto do traballo autónomo e o cliente do que dependa economicamente non sexa unha entidade vinculada.
3. O conxunto de gastos deducibles correspondentes a todas as súas actividades económicas non pode exceder do 30 por 100 dos seus rendementos íntegros declarados.
4. Deberán cumprirse durante o período impositivo todas as obrigas formais e de información, control e verificación que regulamentariamente se determinen.
5. Que non se perciban rendementos do traballo no período impositivo. Non obstante, non se entenderá que se incumpre este requisito cando se perciban durante o período impositivo prestacións por desemprego ou calquera das prestacións previstas na alínea a) do artigo 17.2, sempre que o seu importe non sexa superior a 4.000 euros.
6. Que polo menos o 70 por 100 dos ingresos do período impositivo estean suxeitos a retención ou ingreso á conta.
7. Que non realice actividade económica ningunha a través de entidades en atribución de rendas.
Tributación conxunta
Cando o contribuínte opte pola tributación conxunta, terá dereito á redución cando individualmente cumpra cos requisitos. Neste caso, a contía da redución que hai que computar na declaración conxunta será única e calcularase tendo en conta as rendas da unidade familiar, sen que o seu importe poida ser superior ao rendemento neto das actividades económicas dos membros da unidade familiar que cumpran individualmente os citados requisitos.