REDUCIÓN DO 40 POR 100 (art. 18.2 da lei)

 

Aplicaráselles unha redución do 40 por 100 aos rendementos que teñan un período de xeración superior a dous anos e non se obteñan de forma periódica ou recorrente, así como aqueles cualificados regulamentariamente como obtidos de forma notoriamente irregular no tempo.

 

A contía do rendemento íntegro sobre a que se aplicará a redución non poderá superar o importe de 300.000 euros anuais.

 

Existe un límite específico, na extinción laboral ou mercantil que manteñen coa empresa os administradores e membros dos consellos de administración, das xuntas que fagan as súas veces e demais membros doutros órganos representativos dependendo da contía da indemnización.

 

Cando os rendementos do traballo cun período de xeración superior a dous anos se perciban de forma fraccionada, só será aplicable esta redución do 40 por 100 en caso de que o cociente resultante de dividir o número de anos de xeración, computados de data a data, entre o número de períodos impositivos de fraccionamento, sexa superior a dous (art. 10.2 do regulamento).

 

Opcións de compra sobre accións

 

Sen prexuízo do límite anterior, no caso de rendementos derivados do exercicio de opcións de compra sobre accións ou participacións aos traballadores, a contía do rendemento sobre o que se aplicará a redución do 40 por 100 non poderá superar o importe que resulte de multiplicar o salario medio anual do conxunto dos declarantes no imposto sobre a renda das persoas físicas polo número de anos de xeración do rendemento. Para estes efectos, cando se trate de rendementos obtidos de forma notoriamente irregular no tempo, tomaranse cinco anos.

 

Para estes efectos, consideraranse rendementos do traballo con período de xeración superior a dous anos que non se obteñen de forma periódica e recorrente cando se exerciten transcorridos máis de dous anos desde a súa concesión e, ademais, non se concedan anualmente (art. 11.3 do regulamento).

 

A contía do salario medio anual será para o exercicio 2014 de 22.100 euros (art.11.4 do regulamento).

 

Plans xerais de entrega de opcións de compra sobre accións

 

O límite máximo de redución previsto no parágrafo anterior duplicarase cando os traballadores cumpran os seguintes requisitos:

 

-   As accións ou participacións adquiridas deberán manterse, polo menos, durante tres anos, que se contarán desde o exercicio da opción de compra.

-   A oferta de opcións de compra deberá realizarse nas mesmas condicións a todos os traballadores da empresa, grupo ou subgrupos de empresa.