REDUCIÓN DE CAPITAL (art. 33.3 da lei)

 

Cando a redución de capital, calquera que sexa a súa finalidade, dea lugar á amortización de valores ou participacións, consideraranse amortizadas as adquiridas en primeiro lugar e o seu valor de adquisición distribuirase proporcionalmente entre os restantes valores homoxéneos que permanezan no patrimonio do contribuínte.

Cando a redución de capital non afecte por igual todos os valores ou participacións propiedade do contribuínte, entenderase referida ás adquiridas en primeiro lugar.

Cando a redución de capital teña por finalidade a devolución de achegas, o importe desta ou o valor normal de mercado dos bens ou dereitos percibidos minorará o valor de adquisición dos valores afectados, de acordo coas regras do parágrafo anterior, ata a súa anulación. O exceso que puidese resultar tributará como rendemento do capital mobiliario procedente da participación nos fondos propios de calquera tipo de entidade, na forma prevista para a distribución da prima de emisión, salvo que a dita redución de capital proceda de beneficios non distribuídos, en cuxo caso a totalidade das cantidades percibidas por este concepto tributará de acordo co previsto na alínea a) do artigo 25 1. a) da lei. Para estes efectos, considerarase que as reducións de capital, calquera que sexa a súa finalidade, afectan en primeiro lugar a parte do capital social que non proveña de beneficios non distribuídos, ata a súa anulación.

 

TRANSMISIÓN DE VALORES CON POSTERIORIDADE A UNHA REDUCIÓN DE CAPITAL (DA oitava da lei)

Cando con anterioridade á transmisión de valores ou participacións non admitidos a negociación nalgún dos mercados secundarios oficiais de valores españois se producise unha redución do capital instrumentada mediante unha diminución do valor nominal que non afecte por igual todos os valores ou participacións en circulación do contribuínte, aplicaranse as regras anteriores coas seguintes especialidades:

1-   Considerarase como valor de transmisión o que correspondería en función do valor nominal que resulte da aplicación das regras anteriores.

2-   No caso de que o contribuínte non transmitise a totalidade dos seus valores ou participacións, a diferenza positiva entre o valor de transmisión correspondente ao valor nominal dos valores ou participacións efectivamente transmitidos e o valor de transmisión a que se refire o parágrafo anterior, minorarase do valor de adquisición dos restantes valores ou participacións homoxéneos, ata a súa anulación. O exceso que puidese resultar tributará como ganancia patrimonial.