Os contribuíntes poderán deducir na cota íntegra autonómica, e co límite de 4.000 euros, o 20 por 100 das cantidades investidas durante o exercicio na adquisición de accións ou participacións sociais como consecuencia de acordos de constitución de sociedades ou de ampliación de capital en sociedades anónimas, limitadas, anónimas laborais, limitadas laborais ou cooperativas, sempre que se cumpran os seguintes requisitos:
a) A participación do contribuínte, computada xunto coa do cónxuxe ou persoas unidas por razón de parentesco, en liña directa ou colateral, por consanguinidade ou afinidade, ata o terceiro grao incluído, non pode ser superior ao 40 por 100 do capital social da sociedade obxecto do investimento ou dos seus dereitos de voto en ningún momento e durante os tres anos seguintes á constitución ou ampliación.
b) A entidade en que hai que materializar a entidade debe cumprir os seguintes requisitos:
1. Debe ter o domicilio social e fiscal na comunidade autónoma de Murcia e mantelo durante os tres anos seguintes á constitución ou ampliación.
2. Debe desempeñar unha actividade económica durante os tres anos seguintes á constitución ou ampliación. Para tal efecto non ha de ter por actividade principal a xestión dun patrimonio mobiliario ou inmobiliario.
3. Debe contar, como mínimo, e desde o primeiro exercicio fiscal, cunha persoa ocupada con contrato laboral e a xornada completa, dadas de alta no réxime xeral da Seguridade Social, durante os tres anos seguintes á constitución ou ampliación.
4. En caso de que o investimento se realizase mediante unha ampliación de capital, a sociedade mercantil debeu ser constituída nos tres anos anteriores á data desta ampliación, e ademais, durante os 24 meses seguintes á data do inicio do período impositivo do imposto sobre sociedades en que se realizase a ampliación, o seu cadro de persoal medio debeu incrementarse, polo menos en dúas persoas con respecto ao cadro de persoal medio nos 12 meses anteriores, e que o devandito incremento se manteña durante un período adicional doutros 24 meses.
Para o cálculo do cadro de persoal medio total da empresa e do seu incremento tomaranse as persoas empregadas, nos termos que dispoña a lexislación laboral, tendo en conta a xornada contratada en relación coa xornada completa.
c) O contribuínte pode formar parte do consello de administración da sociedade en que materializou o investimento, pero en ningún caso pode levar a cabo funcións executivas nin de dirección durante un prazo de dez anos. Tampouco pode manter unha relación laboral coa entidade obxecto do investimento durante ese mesmo prazo.
d) As operacións ás que sexa aplicable a dedución deben formalizarse en escritura pública, na cal se debe especificar a identidade dos investidores e o importe do investimento respectivo.
e) As participacións adquiridas deben manterse no patrimonio do contribuínte durante un período mínimo de tres anos, seguintes á constitución ou ampliación.
f) A aplicación da dedución require a comunicación previa á Administración rexional.
O incumprimento dos anteriores requisitos leva consigo a perda do beneficio fiscal.
Esta dedución é incompatible polas mesmas cantidades e obxecto de investimento:
b) Coa dedución autonómica por investimento en accións de entidades que cotizan no segmento de empresas en expansión do mercado alternativo bolsista.
c) Coa dedución estatal por investimentos en empresas de nova ou recente creación.
Forma de cubrir:
Na ventá reflectiranse as cantidades satisfeitas polo titular da declaración.
En caso de matrimonio e se o importe satisfeito corresponde aos cónxuxes por partes iguais, reflectirase o 50 por 100 do total das cantidades satisfeitas por ambos os dous.