As persoas contribuíntes poderán deducir na cota íntegra autonómica o 20 % das cantidades investidas durante o exercicio na adquisición de accións ou participacións sociais como consecuencia de acordos de constitución de sociedades ou de ampliación de capital en sociedades anónimas, limitadas, sociedades laborais e cooperativas.
Con respecto ás mesmas entidades, poderá deducirse o 20 por 100 das cantidades prestadas durante o exercicio, así como das cantidades garantidas persoalmente polo contribuínte, sempre que o préstamo se outorgue ou a garantía se constitúa no exercicio en que se proceda á constitución da sociedade ou ampliación de capital desta.
LÍMITE MÁXIMO DA DEDUCIÓN
A dedución terá un límite conxunto de 20.000 euros.
REQUISITOS
a) A participación do contribuínte, computada xunto coas do cónxuxe ou persoas unidas por razón de parentesco, en liña directa ou colateral, por consanguinidade ou afinidade ata o terceiro grao incluído, non pode ser superior ao 40 % nin inferior ao 1 % do capital social da sociedade obxecto do investimento ou dos seus dereitos de voto en ningún momento e durante os tres anos seguintes á constitución ou ampliación.
En caso de préstamo ou garantía, non será necesaria unha participación do/a contribuínte no capital, pero se esta existise non pode ser superior ao 40 % cos mesmos límites temporais anteriores. O importe prestado ou garantido polo/a contribuínte ten que ser superior ao 1 % do patrimonio neto da sociedade.
b) A entidade na que hai que materializar o investimento debe cumprir os seguintes requisitos:
1. Debe ter o domicilio social e fiscal en Galicia e mantelo durante os tres anos seguintes á constitución ou ampliación.
2. Debe desempeñar unha actividade económica durante os tres anos seguintes á constitución ou ampliación. Para tal efecto, non debe ter por actividade principal a xestión dun patrimonio mobiliario ou inmobiliario, de acordo co disposto no artigo 4.8.dous.a) da Lei 19/1991, do 6 de xuño, do imposto sobre o patrimonio.
3. Debe contar, como mínimo, cunha persoa ocupada con
contrato laboral e a xornada completa, dadas de alta no réxime xeral da
Seguridade Social e con residencia habitual en Galicia, durante os tres anos
seguintes á constitución ou ampliación.
4. No caso de que o investimento se realizase mediante unha ampliación de capital, a sociedade mercantil debeuse constituír nos tres anos anteriores á data desta ampliación e ademais, durante os vinte e catro meses seguintes á data do inicio do período impositivo do imposto sobre sociedades no que se realizase a ampliación, o seu cadro de persoal medio con residencia habitual en Galicia se incrementase, polo menos, en dúas persoas con respecto ao cadro de persoal medio con residencia habitual en Galicia dos doce meses anteriores, e que o dito incremento se manteña durante un período adicional doutros vinte e catro meses.
Para o cálculo do cadro de persoal medio total da empresa e do seu incremento, tomaranse as persoas empregadas, nos termos que dispoña a lexislación laboral, tendo en conta a xornada contratada en relación coa xornada completa.
c) O contribuínte pode formar parte do consello de administración da sociedade na que materializou o investimento, pero en ningún caso pode levar a cabo funcións executivas nin de dirección durante un prazo de dez anos. Tampouco pode manter unha relación laboral coa entidade obxecto do investimento durante ese mesmo prazo, salvo no caso de sociedades laborais ou sociedades cooperativas.
d) As operacións nas que sexa aplicable a dedución deben formalizarse en escritura pública, na que se debe especificar a identidade dos investidores e o importe do investimento respectivo.
e) As participacións adquiridas deben manterse no patrimonio do contribuínte durante un período mínimo de tres anos, seguintes á constitución ou ampliación.
INCUMPRIMENTO DOS REQUISITOS ESIXIDOS
O incumprimento dos requisitos e das condicións establecidas leva consigo a perda do beneficio fiscal e o contribuínte debe incluír na declaración do imposto correspondente ao exercicio no que se produciu o incumprimento a parte do imposto que se deixou de pagar como consecuencia da dedución practicada xunto cos xuros de mora xerados.
INCOMPATIBILIDADE
Esta dedución resultará incompatible, para os mesmos investimentos, coas deducións por creación de novas empresas ou a ampliación da actividade de empresas de recente creación e por investimento en accións de entidades que cotizan no segmento de empresas en expansión do mercado alternativo bolsista.
FORMA DE CUBRIR: abrirase unha ventá de captura de datos na que deberá indicar o importe satisfeito en 2014 con dereito á dedución.