O contribuínte que posúa o título de familia numerosa na data de xeración do imposto poderá deducir as seguintes cantidades:
- 250 euros, cando se trate de familia numerosa de categoría xeral.
- 400 euros, cando se trate de familia numerosa de categoría especial.
Cando algún dos cónxuxes ou descendentes aos que sexa de aplicación o mínimo persoal e familiar do imposto teña un grao de discapacidade igual ou superior ao 65 %, a dedución anterior será de 500 e 800 euros, respectivamente. Para estes efectos as persoas cuxa incapacidade fose recoñecida xudicialmente considerarase que teñen un grao de discapacidade igual ou superior ao 65 %, con independencia do grao de discapacidade que teñan recoñecido.
Esta dedución será practicada polo contribuínte con quen convivan os restantes membros da familia numerosa. Cando estes convivan con máis dun, o importe da dedución ratearase por partes iguais na declaración de cada un deles.
A práctica desta dedución quedará condicionada á xustificación documental adecuada e suficiente do presuposto de feito e os requisitos que determinan a súa aplicabilidade.
Forma de cubrir
Indicarase a través dunha ventá de captura de datos a seguinte información:
- A dedución corresponderá a quen posúa o título de familia numerosa (normalmente os pais). En caso de matrimonio, cando a dedución corresponda a ambos os cónxuxes, marcarase cunha X na columna "Común" a categoría de familia numerosa na que se encontre clasificado.
- En caso contrario, marcarase na columna "Do Titular" e deberase indicar, ademais, o número de persoas que teñen dereito á dedución:"1", cando só poida aplicala o titular seleccionado; "2" cando poidan aplicala dúas persoas etc.