Poderá deducirse o 20 por 100 das doazóns efectuadas durante o período impositivo a favor de calquera das seguintes entidades:
• A Generalitat e as corporacións locais da Comunidade Valenciana.
• As entidades públicas dependentes de calquera das administracións territoriais anteriores, cuxo obxecto social sexa a defensa e conservación do medio.
• As entidades sen fins lucrativos reguladas nas alíneas a) e b) do artigo 2 da Lei 49/2002, do 23 de decembro, de réxime fiscal das entidades sen fins lucrativos e dos incentivos fiscais ao mecenado, sempre que o seu fin exclusivo sexa a defensa do medio e se encontren inscritas nos correspondentes rexistros da Comunidade Valenciana.
• Para ter dereito a esta dedución, deberá acreditarse a efectividade da doazón efectuada, así como o valor desta, mediante certificación expedida pola entidade donataria na que, ademais do número de identificación fiscal e dos datos de identificación persoal do doador e da entidade donataria, se fagan constar os seguintes extremos:
• 1) Data e importe do donativo, cando este sexa en diñeiro.
• 2) Documento público ou outro documento auténtico acreditativo da entrega do ben doado, cando se trate de doazóns en especie. En relación coas doazóns ás que se refire o número 1 da letra q), será mención inescusable do documento o número de identificación que no Inventario xeral do patrimonio cultural valenciano corresponda ao ben doado.
• 3) Mención expresa do carácter irrevogable da doazón. En calquera caso, a revogación da doazón determinará a obriga de ingresar as cotas correspondentes aos beneficios gozados no período impositivo no que a dita revogación se produza, máis os xuros de mora que procedan, na forma establecida pola normativa estatal reguladora do imposto sobre a renda das persoas físicas.
• 4) Mención expresa de que a entidade donataria se encontra incluída entre as reguladas nos apartados a) e b) do artigo 2 da Lei 49/2002, do 23 de decembro, de réxime fiscal das entidades sen fins lucrativos e dos incentivos fiscais ao mecenado, cando a doazón se efectúe a favor de entidades sen fins lucrativos reguladas na citada lei.
Sen prexuízo do anterior, tratándose de doazóns en especie, a citada certificación deberá acompañarse doutra acreditativa do valor dos bens doados, expedida pola consellería competente en cada caso por razón do obxecto ou finalidade da doazón.
Forma de cubrir
Na ventá reflectiranse as cantidades doadas polo titular da dedución.
En caso matrimonio e se a doazón é realizada polos cónxuxes por partes iguais, indicarase o 50 por 100 da contía total doada.