Os contribuíntes con residencia habitual na Comunidade Autónoma da Rioxa poderán deducir o 7 por 100, co límite anual de 450,76 euros, das cantidades que destinen á construción, ampliación, adquisición ou rehabilitación da vivenda que constitúa a súa segunda residencia nos municipios da Rioxa que se relacionan no anexo ao artigo 3 da Lei 6/2009, da Comunidade Autónoma da Rioxa, sempre que o dito municipio sexa diferente ao da súa vivenda habitual.
Para poder ter dereito á dedución, débense cumprir os requisitos para ter dereito á dedución estatal por investimento en vivenda habitual, isto é, a dedución non será aplicable cando a adquisición da vivenda ou as obras de rehabilitación se producisen con posterioridade ao 31 de decembro de 2012.
Desta dedución só se poderá beneficiar unha única vivenda distinta da habitual por contribuínte.
En canto aos conceptos de construción, ampliación, rehabilitación, e elementos que integran a base da dedución, así como sobre comprobación da situación patrimonial ao finalizar o período da imposición, resultan aplicables os mesmos requisitos que con carácter xeral se establecen na Lei do imposto.
LÍMITES das deducións autonómicas da Rioxa
A base máxima anual das deducións autonómicas para adquisición de vivenda e de segunda vivenda no medio rural virá constituída polo importe resultante de minorar a cantidade de 9.040 euros naquelas cantidades que constitúan para o contribuínte a base da dedución por investimento en vivenda habitual establecida na normativa estatal do imposto.
Para estes efectos, na consideración da base da dedución xeral non se terá en conta a que corresponda, se é o caso, polas obras ou instalacións de adecuación efectuadas por persoas con discapacidade a que se refire o artigo 68.1.4 da Lei do IRPF.
Ademais, estas deducións autonómicas por adquisición de vivenda requiren que o importe comprobado do patrimonio do contribuínte, ao finalizar o período da imposición, exceda do valor que resultase da súa comprobación ao comezo deste, de acordo co artigo 70 da Lei do IRPF.
Forma de cubrir
Na ventá reflectiranse as cantidades satisfeitas polo titular da declaración que dean dereito á dedución, tendo en conta as limitacións indicadas na epígrafe "base da dedución".
En caso de matrimonio, e se o importe satisfeito corresponde aos cónxuxes por partes iguais, reflectirase o 50 por 100 da totalidade das cantidades satisfeitas por ambos.
Deberá seleccionar tamén o municipio no que se encontre a vivenda. Para estes efectos, o programa reflectirá o código que corresponde ao municipio seleccionado.