1 - O nacemento ou adopción do terceiro fillo ou sucesivos outorgará o dereito á seguinte dedución:
a) A dedución será de 500 euros por cada nacemento ou adopción do terceiro ou sucesivos fillos e aplicarase unicamente no período impositivo no que o dito nacemento ou adopción se produza.
b) Non obstante, a dedución será de 600 euros cando a suma da base impoñible xeral e a base impoñible do aforro, menos o mínimo do contribuínte e o mínimo por descendentes, non sexa superior a 35.000 euros en declaración conxunta e 21.000 euros en declaración individual.
c) A dedución corresponderalle ao contribuínte con quen convivan os fillos que dean dereito á dedución. Se conviven con máis dun contribuínte e estes practican declaración individual, o importe da dedución ratearase por partes iguais na declaración de cada un deles.
2 - O nacemento ou adopción do segundo fillo, cando este ou o primeiro fillo nacido ou adoptado presenten un grao de discapacidade igual ou superior ao 33 %, outorgará o dereito a unha dedución nos mesmos termos ca os establecidos no parágrafo anterior. O grao de discapacidade que dá dereito á presente dedución deberá estar referido á data de xeración do imposto e recoñecido mediante resolución expedida polo órgano competente en materia de servizos sociais.
Forma de cubrir
En caso de matrimonio, se ambos os cónxuxes teñen dereito á dedución, deberá indicar no recadro "Comúns" o número de fillos nacidos ou adoptados no ano.
Noutro caso, o número de fillos nacidos ou adoptados no ano reflectirase no recadro “Do titular”. Neste suposto deberá cubrir, adicionalmente, o número de persoas que teñen dereito a aplicar a dedución con respecto a eses fillos, reflectindo nel un 1 se o dereito á dedución corresponde só ao contribuínte ou un 2 se hai dous proxenitores con dereito a esta.