153 euros pola realización por un dos cónxuxes da unidade familiar de labores non remunerados no fogar. Esta dedución é calculada e aplicada polo programa.
Serán REQUISITOS para o gozo desta dedución:
1) Que un dos cónxuxes da unidade familiar realice labores non remunerados no fogar.
Entenderase que un dos cónxuxes realiza estes labores cando dentro da 1ª modalidade de unidade familiar só un dos seus membros perciba rendementos de traballo ou de actividades económicas.
2) Que a suma das bases liquidables da unidade familiar non supere a cantidade de 25.000 euros.
3) Que ningún dos membros da unidade familiar obteña ganancias patrimoniais, rendementos íntegros do capital mobiliario ou inmobiliario, que, en conxunto, superen os 357 euros, nin lle sexan imputadas rendas inmobiliarias.
Para o cómputo do límite cando os rendementos procedan de dividendos e participacións en beneficios, o importe que se computará para cada un dos membros da unidade familiar será a contía na que o importe íntegro percibido por el exceda de 1.500 euros.
4) Que teñan dous ou máis descendentes que dean dereito ao mínimo por descendentes. Se os descendentes non fosen comúns, este requisito deberá cumprilo, polo menos, un dos cónxuxes.
Tributación individual
En caso de tributación individual, a dedución corresponderalle ao cónxuxe que realice os labores non remunerados no fogar e o límite de base liquidable calcularase agregando as bases liquidables dos distintos membros da unidade familiar.
Tributación conxunta
Sempre e cando se cumpran os requisitos establecidos, esta dedución poderá aplicarse na declaración conxunta da unidade familiar.
LÍMITE DA DEDUCIÓN
O importe íntegro da dedución só se aplicará nos supostos nos que as sumas das bases liquidables da unidade familiar sexa inferior a 23.000 euros.
Cando a suma das bases liquidables da unidade familiar estea comprendida entre 23.000 e 25.000 euros, o importe da dedución será o resultado de multiplicar o importe ou límite de dedución por unha porcentaxe obtida da aplicación da seguinte fórmula: 100 X (1 – o coeficiente resultante de dividir por 2000 a diferenza entre a suma da base liquidable xeral e do aforro do contribuínte e 23.000).