PERDAS POR DETERIORACIÓN DO VALOR DOS ELEMENTOS PATRIMONIAIS. IMPORTES DEDUCIBLES

 

Serán deducibles fiscalmente, cos límites e exclusións establecidos no artigo 12 da Lei do imposto sobre sociedades, as perdas por deterioración do valor dos seguintes activos:

 

1.   Serán deducibles as perdas por deterioración dos fondos editoriais, fonográficos e audiovisuais das entidades que realicen a correspondente actividade produtora, unha vez transcorridos dous anos desde a posta no mercado das respectivas producións. Antes do transcurso do dito prazo, tamén poderán ser deducibles se se probase a deterioración.

 

2.   Serán deducibles as perdas por deterioración dos créditos derivadas das posibles insolvencias dos debedores, cando no momento da xeración do imposto concorra algunha das seguintes circunstancias:

 

a)   Que transcorrese o prazo de seis meses desde o vencemento da obriga.

b)   Que o debedor estea declarado en situación de concurso.

c)   Que o debedor estea procesado polo delito de alzamento de bens.

d)   Que as obrigas fosen reclamadas xudicialmente ou sexan obxecto dun  litixio xudicial ou procedemento arbitral de cuxa solución dependa o seu cobramento.

 

Non serán deducibles as perdas respecto dos créditos que seguidamente se citan, excepto que sexan obxecto dun procedemento arbitral ou xudicial que verse sobre a súa existencia ou contía:

1.º Os debidos ou afianzados por entidades de dereito público.

2.º Os afianzados por entidades de crédito ou sociedades de garantía recíproca.

3.º Os garantidos mediante dereitos reais, pacto de reserva de dominio e dereito de retención, excepto nos casos de perda ou envilecemento da garantía.

4.º Os garantidos mediante un contrato de seguro de crédito ou caución.

5.º Os que fosen obxecto de renovación ou prórroga expresa.

 

Non serán deducibles as perdas para a cobertura do risco derivado das posibles insolvencias de persoas ou entidades vinculadas co acredor, salvo no caso de insolvencia xudicialmente declarada, nin as perdas baseadas en estimacións globais do risco de insolvencias de clientes e debedores.

 

3.   Será deducible o prezo de adquisición orixinario do inmobilizado intanxible correspondente a fondos de comercio, co límite anual máximo da vinteava parte do seu importe, sempre que se cumpran os seguintes requisitos:

 

a) Que se puxese de manifesto mediante unha adquisición a título oneroso.

b) Que a entidade adquirente e transmisora non formen parte dun grupo de sociedades segundo os criterios establecidos no artigo 42 do Código de comercio, con independencia da residencia e da obriga de formular contas anuais consolidadas. Se ambas as entidades forman parte dun grupo, a dedución aplicarase respecto do prezo de adquisición do fondo de comercio satisfeito pola entidade transmisora cando o adquirise de persoas ou entidades non vinculadas.

c) Que se dotase unha reserva indispoñible, polo menos, polo importe fiscalmente deducible, nos termos establecidos na lexislación mercantil. Caso de non poderse dotar a dita reserva, a dedución está condicionada a que se dote esta con cargo aos primeiros beneficios de exercicios seguintes.

 

Esta dedución non está condicionada á súa imputación contable na conta de perdas e ganancias. As cantidades deducidas minorarán, para os efectos fiscais, o valor do fondo de comercio.

 

4.   Cando se cumpran os requisitos previstos nos parágrafos a) e b) anteriores, será deducible co límite anual máximo da décima parte do seu importe o inmobilizado intanxible con vida útil indefinida.

 

Esta dedución non está condicionada á súa imputación contable na  conta de perdas e ganancias. As cantidades deducidas minorarán, para os efectos fiscais, o valor do inmobilizado.