OUTROS SUPOSTOS DE RETRIBUCIÓN EN ESPECIE (art. 43 da lei)

 

A)  PRÉSTAMOS CON TIPOS DE XURO INFERIORES AO LEGAL DO DIÑEIRO

 

Considerarase renda en especie a diferenza entre o xuro pagado e o xuro legal do diñeiro vixente no período.

 

Non obstante, non terán a consideración de retribución en especie os préstamos con tipo de xuro inferior ao legal do diñeiro concertados con anterioridade ao 1 de xaneiro de 1992 e cuxo principal fose posto á disposición do prestameiro tamén con anterioridade á dita data (DA segunda da lei).

 

 

B)  PRESTACIÓNS EN CONCEPTO DE MANUTENCIÓN, HOSPEDAXE, VIAXES E SIMILARES

 

Sen prexuízo das axudas de custo e gastos de viaxe exceptuados de gravame, as prestacións en concepto de manutención, hospedaxe, viaxes e similares valoraranse polo custo para o pagador, incluídos os tributos que graven a operación.

 

 

C)  PRIMAS OU COTAS SATISFEITAS EN VIRTUDE DE CONTRATO DE SEGURO OU SIMILAR

 

Valoraranse polo custo para o pagador, incluídos os tributos que graven a operación.

 

Non obstante, non terán a consideración de retribución en especie as primas ou cotas satisfeitas a entidades aseguradoras para a cobertura de enfermidade do propio traballador, cónxuxe e descendentes nas condicións establecidas legalmente.

 

 

D)  CANTIDADES DESTINADAS A SATISFACER GASTOS DE ESTUDO E MANUTENCIÓN

 

As cantidades destinadas a satisfacer gastos de estudos e manutención do contribuínte ou doutras persoas ligadas a este por vínculo de parentesco, incluídos os afíns, ata o cuarto grao inclusive, valoraranse polo custo para o pagador, incluídos os tributos que graven a operación.

 

Non obstante, non terán a consideración de retribución en especie as cantidades destinadas á actualización, capacitación ou reciclaxe do persoal empregado cando veñan esixidas polo desenvolvemento das súas actividades ou as características dos postos de traballo.

 

 

E)  PLANS DE PENSIÓNS E COMPROMISOS POR PENSIÓNS

 

As contribucións satisfeitas polos promotores de plans de pensións ou polas empresas promotoras previstas na Directiva 2003/41/CE do Parlamento Europeo e do Consello, do 3 de xuño de 2003, así como as cantidades satisfeitas por empresarios para facer fronte aos compromisos por pensións nos termos previstos na disposición adicional primeira do Real decreto lexislativo 1/2002, do 29 de novembro, polo que se aproba a Lei de regulación dos plans e fondos de pensións, incluiranse como rendementos do traballo en especie polo seu importe.

Igualmente polo seu importe, as cantidades satisfeitas por empresarios aos seguros de dependencia.