Na tributación conxunta serán aplicables as regras xerais do imposto sobre determinación da renda dos contribuíntes, determinación das bases impoñible e liquidable e determinación da débeda tributaria. Coas seguintes especialidades:
1- Todos os membros da unidade familiar quedarán conxunta e solidariamente sometidos ao imposto, sen prexuízo do dereito a ratear entre si a débeda tributaria, segundo a parte de renda suxeita que lle corresponda a cada un deles.
2- As rendas de calquera tipo obtidas polas persoas físicas integradas nunha unidade familiar que optasen pola tributación conxunta serán gravadas acumuladamente.
3- Os importes e límites cuantitativos establecidos para os efectos da tributación individual aplicaranse en idéntica contía na tributación conxunta, sen que proceda a súa elevación ou multiplicación en función do número de membros da unidade familiar, coas excepcións que se recollen no artigo 84 da Lei do IRPF. Non obstante:
- Os límites máximos de redución por achegas a sistemas de previsión social e a patrimonios protexidos das persoas con discapacidade serán aplicados individualmente por cada partícipe ou mutualista integrado na unidade familiar.
- En calquera das modalidades de unidade familiar, o mínimo do contribuínte será de 5.151 euros anuais, con independencia do número de membros integrados nesta. Para a cuantificación do incremento do mínimo do contribuínte por causa da idade e do mínimo por discapacidade teranse en conta as circunstancias persoais de cada un dos cónxuxes integrados na unidade familiar.
4- Na tributación conxunta serán compensables, conforme as normas xerais do imposto, as perdas patrimoniais e as bases liquidables xerais negativas, realizadas e non compensadas polos contribuíntes compoñentes da unidade familiar en períodos impositivos anteriores en que tributasen individualmente.
5- Os mesmos conceptos determinados en tributación conxunta serán compensables exclusivamente, en caso de tributación individual posterior, por aqueles contribuíntes a quen correspondan de acordo coas regras sobre individualización de rendas contidas na Lei do imposto.