O réxime de estimación obxectiva aplicarase ás actividades económicas que desenvolva o contribuínte, sempre que se cumpran as seguintes CONDICIÓNS:
1- Que a actividade estea recollida especificamente na orde ministerial que regula este réxime (Orde HAP/2368/2013, do 26 de novembro).
2- Que o volume de rendementos íntegros do conxunto das actividades económicas desenvolvidas polo contribuínte, no ano inmediato anterior, non supere 450.000 euros anuais.
Este límite será de 300.000 euros anuais para o conxunto de actividades clasificadas nas epígrafes 722 (Transporte de mercancías por estrada) e 757 (Servizos de mudanzas) ás que sexan de aplicación a porcentaxe de retención do 1 por 100 conforme o disposto no artigo 101.5.d. da Lei do IRPF.
Tamén quedarán excluídos do método de estimación obxectiva os contribuíntes que alcancen un volume de ingresos íntegros procedentes de persoas obrigadas a reter ou a ingresar a conta e que superen, no exercicio anterior, a cantidade de 50.000 euros anuais. Agora ben, este límite pode chegar ata a cantidade de 225.000 euros de rendementos íntegros se o importe obtido destas persoas non alcanza o 50 por 100 do volume total.
Non obstante, deberán computarse non só as operacións correspondentes ás actividades económicas desenvolvidas polo contribuínte, senón tamén as correspondentes ás desenvolvidas polo cónxuxe, descendentes e ascendentes, así como por entidades en réxime de atribución de rendas nas que participen calquera dos anteriores, nas que concorran as seguintes circunstancias:
- Que as actividades económicas desenvolvidas sexan idénticas ou similares. Para estes efectos, entenderase que son idénticas ou similares as actividades económicas clasificadas no mesmo grupo no imposto sobre actividades económicas.
- Que exista unha dirección común de tales actividades, compartíndose medios persoais ou materiais.
3- Que o volume de compras en bens e servizos, excluídas as adquisicións de inmobilizado no exercicio anterior, non supere a cantidade de 300.000 euros anuais. No suposto de obras ou servizos subcontratados, o importe destes terase en conta para o cálculo deste límite.
Para estes efectos, deberá computarse non só o volume de compras correspondentes ás actividades económicas desenvolvidas polo contribuínte, senón tamén as correspondentes ás desenvolvidas polo cónxuxe, descendentes e ascendentes, así como por entidades en réxime de atribución de rendas nas que participen calquera dos anteriores, nas que concorran as circunstancias sinaladas no parágrafo 2 anterior.
4- Cando no ano inmediato anterior se iniciase unha actividade, o volume de compras elevarase ao ano.
5- Que non se superase durante o ano anterior a magnitude específica máxima establecida para cada actividade na alínea d) do artigo terceiro da Orde do 26 de novembro de 2013 (en xeral, número de persoas empregadas; salvo para as actividades de transporte, nas que se teñen en conta os vehículos utilizados).
Para estes efectos, deberá computarse non só o volume de compras correspondentes ás actividades económicas desenvolvidas polo contribuínte, senón tamén as correspondentes ás desenvolvidas polo cónxuxe, descendentes e ascendentes, así como por entidades en réxime de atribución de rendas nas que participen calquera dos anteriores, nas que concorran as circunstancias sinaladas na alínea 2 anterior.
O primeiro ano de exercicio da actividade terase en conta o número de persoas empregadas ou vehículos ao inicio desta.
6- Que o contribuínte non determine o rendemento neto de ningunha actividade económica polo réxime de estimación directa, en calquera das súas modalidades.
Cando se inicie durante o ano algunha actividade económica non incluída ou pola que se renuncie ao réxime de estimación obxectiva, a exclusión do réxime, respecto das actividades que se viñan realizando, producirase ao ano seguinte.
7- Que non se renunciase, no tempo e na forma que procedan, á súa aplicación.
8- Que non se renunciase nin se estea excluído do réxime simplificado do IVE.
9- Que as actividades económicas se desenvolvan, total ou parcialmente, dentro do ámbito de aplicación do imposto. Para estes efectos, entenderase que as actividades de transporte urbano colectivo e de viaxeiros por estrada, de transporte por autotaxis, de transporte de mercadorías por estrada e de servizos de mudanzas, se desenvolven, en calquera caso, dentro do ámbito de aplicación do imposto.