Farase constar nesta epígrafe a totalidade dos ingresos, incluídos o autoconsumo, as subvencións e demais transferencias.
INGRESOS DE EXPLOTACIÓN
Constitúen os ingresos de explotación o importe das contraprestacións obtidas pola venda de bens e a prestación dos servizos que constitúan o obxecto da actividade, incluídos os procedentes de servizos accesorios á actividade principal.
OUTROS INGRESOS (incluídas subvencións e outras transferencias)
Incluiranse nesta rúbrica, entre outros, os seguintes conceptos:
A) Traballos realizados para a propia empresa
Sen prexuízo do seu cómputo como gasto de acordo coa súa natureza, ao final do exercicio considerarase como ingreso en contrapartida o custo de produción do inmobilizado fabricado ou construído pola propia empresa.
B) Excesos e aplicacións de provisións
Faranse constar como ingreso os excesos e aplicacións de provisións que constituísen gasto fiscalmente deducible.
C) Outros ingresos de xestión
Como, por exemplo, contraprestacións por servizos de mediación realizados de maneira accidental, ou pola prestación eventual de certos servizos (transporte, reparacións, asesoría, informes...), ou ingresos por servizos ao persoal.
D) Indemnizacións percibidas de entidades aseguradoras
Indemnizacións percibidas de entidades aseguradoras por sinistros que afectasen produtos da explotación (existencias de mercadorías, materias primas, envases, embalaxes etc.).
E) Subvencións e axudas públicas
Indicaranse as subvencións e outras axudas públicas percibidas no exercicio da actividade, sen incluír aquelas que estean exentas e conforme os seguintes criterios de imputación:
• Subvencións de capital
Son as concedidas para favorecer o establecemento da actividade ou a realización de investimentos en inmobilizado.
Impútanse como ingreso en proporción á depreciación experimentada no exercicio (amortización) polos activos financiados coas ditas subvencións.
No caso de activos non depreciables, a subvención imputarase ao resultado do exercicio no que se produza o alleamento ou baixa no inventario destes, con aplicación no recadro 117 da redución do 40 por 100 por seren considerados regulamentariamente como rendementos obtidos de forma notoriamente irregular no tempo.
• Subvencións á explotación
Son as concedidas, en xeral, para asegurar unha rendibilidade mínima ou compensar perdas ocasionadas na actividade.
Impútanse integramente como ingreso no período en que se xeren.
AUTOCONSUMO DE BENS E SERVIZOS (art. 28.4 da lei)
Incluirase como ingreso o valor normal de mercado dos bens e servizos obxecto da actividade que o contribuínte ceda ou preste a terceiros de forma gratuíta ou se destinen ao uso ou consumo propios.
Así mesmo, cando medie contraprestación e esta sexa notoriamente inferior ao valor normal no mercado dos bens e servizos, atenderase a este último.
TRANSMISIÓN DE ELEMENTOS PATRIMONIAIS QUE GOZASEN DE LIBERDADE DE AMORTIZACIÓN: EXCESO DE AMORTIZACIÓN DEDUCIDA RESPECTO DA AMORTIZACIÓN DEDUCIBLE (disposición adicional trixésima da Lei do IRPF)
Se se transmitiron elementos patrimoniais que gozasen da liberdade de amortización prevista na disposición adicional undécima ou na disposición transitoria trixésimo sétima, ambas do texto refundido da Lei do imposto sobre sociedades, para o cálculo da ganancia ou perda patrimonial a que, se é o caso, poida dar lugar a transmisión, non se minorará o valor de transmisión no importe das amortizacións fiscalmente deducidas que excedan das que fosen fiscalmente deducibles de non se aplicar aquela.
O citado exceso terá a consideración do rendemento íntegro da actividade económica e deberá consignalo no recadro 93 do apartado E1 no período impositivo en que efectúe a transmisión.
Tratamento do IVE
Entre os ingresos non se debe incluír o importe do IVE repercutido, salvo que a actividade desenvolvida se encontre no réxime especial da recarga de equivalencia ou no de agricultura, gandería e pesca.