ENTREGA DE PRODUTOS OU TRABALLOS, SERVIZOS OU ACTIVIDADES ACCESORIOS
Situándose no recadro que corresponda en función do cultivo, do tipo de gando, das características da actividade forestal ou do servizo de que se trate, introduciranse, a través dunha ventá de captura de datos, os ingresos procedentes de cada un dos produtos obtidos (ou servizos prestados) no desenvolvemento da actividade.
Nas actividades agrícolas deberá terse en conta a distinción que aparece en pantalla entre ingresos procedentes de cultivos en terras propias e en terras arrendadas.
Cando non sexa posible delimitar os ditos ingresos, ratearase en función da porcentaxe que supoñan as terras arrendadas dedicadas a cada cultivo con respecto á superficie total, propia ou arrendada, dedicada a ese cultivo.
Deberase delimitar, por cada tipo de produto, e en función de que os ingresos procedan de cultivos en terras propias ou/e en terras arrendadas, ou do tipo de explotación gandeira, os seguintes datos a partir do rendemento neto sempre que se tivese dereito aos correspondentes índices correctores:
1- Parte do rendemento neto resultante que procede de agricultura ecolóxica se o houbese.
2- Parte do rendemento neto resultante que procede de terras de regadío que utilice enerxía eléctrica.
3- Parte do rendemento neto resultante que proceda de ambas as circunstancias, de agricultura ecolóxica e á vez utilice enerxía eléctrica para o seu regadío.
ACTIVIDADES DE TRANSFORMACIÓN, ELABORACIÓN OU MANUFACTURA
No suposto de actividades nas que se sometan os produtos naturais a procesos de transformación, elaboración ou manufactura, indicarase o valor, a prezo de mercado, dos produtos naturais incorporados ao proceso durante o exercicio, así como o dos incorporados antes do 1 de xaneiro de 1998, cando o produto obtido fose transmitido no exercicio.
ÍNDICES REDUCIDOS
Como regra xeral, os ingresos deberán consignarse na primeira fila da ventá de captura de datos, para que o programa aplique os índices de rendemento neto xerais recollidos na Orde do 22 de novembro de 2013.
Non obstante, en previsión de que por circunstancias excepcionais sexan aprobados, para algúns cultivos, tipos de gando ou especies forestais e en zonas determinadas, índices de rendemento neto reducidos, na ventá habilítanse filas adicionais nas que, xunto cos ingresos, pode indicarse o índice específico aplicable cando sexa distinto do xeral.
AUTOCONSUMO, SUBVENCIÓNS E INDEMNIZACIÓNS
Para determinar o volume total de ingresos por cada tipo de produto (ou servizos), incluirase o autoconsumo, así como as subvencións correntes e de capital (na parte imputable ao exercicio) e as indemnizacións percibidas por danos sufridos nos produtos da explotación.
Non obstante, hai que ter en conta que determinadas subvencións e axudas públicas están exentas.
Os ingresos obtidos por estes conceptos atribuiranse aos produtos aos que as subvencións ou indemnizacións se encontren vinculados.
En caso de que non se poida establecer unha vinculación concreta cun produto determinado, por se conceder en relación co conxunto da actividade desenvolvida, o seu importe distribuirase proporcionalmente entre cada un dos produtos, aplicando a seguinte fórmula:
Ingresos produto X
Subvención x -------------------------------------- = Parte imputable produto X
Volume total de ingresos
Imputación das subvencións
- Subvencións de capital
Son as concedidas para favorecer o establecemento da actividade ou a realización de investimentos en inmobilizado.
Impútanse como ingreso en proporción á depreciación experimentada no exercicio (amortización) polos activos financiados coas ditas subvencións.
No caso de activos non depreciables, a subvención imputarase ao resultado do exercicio no que se produza o alleamento ou baixa no inventario destes, con aplicación no recadro 172 da redución do 40 por100 por ser considerados regulamentariamente como rendementos obtidos de forma notoriamente irregular no tempo.
- Subvencións á explotación:
Son as concedidas, en xeral, para asegurar unha rendibilidade mínima ou compensar perdas ocasionadas na actividade.
Impútanse integramente como ingreso no período en que se xeren.