Cando en períodos impositivos posteriores ao da súa aplicación se perda o dereito, en todo ou en parte, ás deducións practicadas, o contribuínte estará obrigado a lles sumar á cota líquida estatal e á cota líquida autonómica ou complementaria xeradas no exercicio en que se incumprisen os requisitos as cantidades indebidamente deducidas máis os xuros de mora que correspondan.
Deberán distinguirse as seguintes posibilidades no reintegro de deducións:
- Deducións xerais da cota correspondentes aos exercicios 1996 e anteriores
Nestes exercicios non estaba vixente o actual sistema de financiamento autonómico, establecido pola Lei 14/1996 e, polo tanto, o importe das deducións indebidas, xunto cos xuros de mora, engadirase integramente á cota líquida estatal.
- Deducións xerais da cota correspondentes aos exercicios 1997 a 2012
Deberá distinguirse:
a) Deducións xerais da cota correspondentes aos exercicios 1997 a 2001
Engadiráselle á cota líquida estatal o 85 por 100 das deducións indebidamente practicadas, xunto cos xuros de mora, e á cota líquida autonómica ou complementaria, o 15 por 100 restante, máis os seus correspondentes xuros, posto que esas eran as porcentaxes de participación vixentes neses exercicios.
b) Deducións xerais da cota correspondentes aos exercicios 2002 a 2008
Engadiráselle á cota líquida estatal o 67 por 100 das deducións indebidamente practicadas, xunto cos xuros de mora, e á cota líquida autonómica ou complementaria, o 33 por 100 restante, máis os correspondentes xuros de mora.
c) Deducións xerais da cota dos exercicios 2009 e 2012
Engadiráselle á cota líquida estatal o 50 por 100 das deducións indebidamente practicadas, xunto cos xuros de mora, e á cota líquida autonómica ou complementaria, o 50 por 100 restante, máis os correspondentes xuros de mora.
d) Deducións por investimento en vivenda habitual dos exercicios 2002 a 2012
O importe do tramo estatal da dedución indebida (máis os xuros de demora) aplicarase a incrementar a cota líquida estatal e o importe do tramo autonómico (máis os xuros de demora) aplicarase a incrementar a cota autonómica ou complementaria.
- Deducións autonómicas da cota correspondentes aos exercicios 1998 a 2012
Engadiráselle á cota líquida autonómica ou complementaria a totalidade das deducións indebidamente practicadas, xunto cos xuros de mora.
A partir do 1 de xaneiro de 2013 suprimiuse a dedución por adquisición de vivenda, Non obstante, establécese un réxime transitorio de dedución por investimento en vivenda habitual (DT décimo oitava).
Respecto dos contribuíntes que depositasen cantidades en conta vivenda con anterioridade ao 1 de xaneiro de 2013:
Non poderán aplicar a partir do 1 de xaneiro de 2013 o réxime transitorio da dedución por vivenda.
Non perden as deducións practicadas en exercicios anteriores, que seguen vinculadas ao cumprimento de todos os requisitos das contas vivenda vixentes no momento en que se practicaron tales deducións para consolidarse.
FORMA DE CUBRIR
- IMPORTE DAS DEDUCIÓNS INDEBIDAS
Consignarase o importe das deducións practicadas en exercicios anteriores cando se perdese o dereito á dedución no ano 2013 como consecuencia do incumprimento de calquera dos requisitos establecidos para a súa aplicación.
Para as deducións xerais de 1997 a 2013, deberá distinguir a parte correspondente ao tramo estatal e ao tramo autonómico da dedución de acordo coas regras citadas no parágrafo anterior.
- XUROS DE MORA
Farase constar o importe dos xuros de mora correspondentes ás deducións indebidamente practicadas que se incluíron no parágrafo anterior, distinguindo os correspondentes ao tramo estatal e ao tramo autonómico da dedución.
O programa tamén prevé unha opción de cálculo dos xuros a través dunha ventá de captura de datos, na que se recolle a seguinte información:
• "Data final" (data para os efectos de cálculo): indicarase a data na que vai presentar a declaración do exercicio 2013.
• "Exercicio": deberá facer constar o exercicio correspondente á declaración na que se practicou a dedución cuxos requisitos se incumpriron no ano 2013.
• "Importe": indicarase o importe da dedución indebidamente practicada.
• "Para ingresar/Para devolver": sinale o resultado da declaración na que se practicou a dedución (I ou D).
• "Data de inicio":
a) Declaracións para ingresar: se a declaración foi para ingresar, o propio programa reflicte a data de inicio para o cómputo dos xuros, que será a do vencemento do prazo de declaración do exercicio de que se trate.
b) Declaracións para devolver: se a declaración na que se practicou a dedución foi para devolver, deberá indicarse nesta epígrafe a data en que se obtivo a devolución.
No caso particular de que o importe da devolución percibida fose inferior ao importe da dedución que se restitúe, deberá desagregarse esta última en dúas partes:
1- Por un lado, ata a contía da devolución, indicando como data de inicio aquela en que se obtivo a devolución.
2- E por outro, o exceso da dedución indebida sobre o importe da devolución, indicando como data de inicio a do vencemento do prazo de declaración do exercicio de que se trate:
DECLARACIÓN VENCEMENTO
Exercicio 1997 22-06-1998
Exercicio 1998 21-06-1999
Exercicio 1999 20-06-2000
Exercicio 2000 20-06-2001
Exercicio 2001 01-07-2002
Exercicio 2002 30-06-2003
Exercicio 2003 01-07-2004
Exercicio 2004 30-06-2005
Exercicio 2005 30-06-2006
Exercicio 2007 30-06-2008
Exercicio 2008 30-06-2009
Exercicio 2009 30-06-2010
Exercicio 2010 30-06-2011
Exercicio 2011 02-07-2012
Exercicio 2012 01-07-2013
(NOTA: o programa reflicte a data de vencemento do prazo de declaración se na epígrafe "Para ingresar/Para devolver" se sinala I).