Nesta epígrafe declararase a parte das ganancias patrimoniais derivadas da transmisión de elementos afectos a actividades económicas que, por acollerse no seu momento ao réxime de reinvestimento establecido no artigo 21 da Lei 43/1995, do 27 de decembro, do imposto sobre sociedades, na redacción deste vixente ata o 1 de xaneiro de 2002, proceda imputar ao exercicio 2014.
FORMA DE CUBRIR
Atención: en caso de transmisión de elementos patrimoniais que sexan comúns a ambos os cónxuxes, só se poderá beneficiar do réxime de diferimento por reinvestimento a parte da ganancia patrimonial que corresponda ao cónxuxe que desenvolva a actividade económica.
IMPORTE DA GANANCIA PATRIMONIAL IMPUTABLE A 2014
Consignarase o importe da ganancia patrimonial acollida ao réxime de diferimento por reinvestimento imputable ao ano 2014 en función do método de integración elixido.
MÉTODOS DE INTEGRACIÓN (art. 21.3 da Lei 43/1995 (derrogado); art. 34 do Real decreto 537/1997)
As ganancias patrimoniais diferidas integraranse na base impoñible de acordo con algún dos seguintes métodos de diferimento, a elección do contribuínte:
1- Nos períodos impositivos que conclúan nos sete anos seguintes ao peche do período impositivo no que venza o prazo de reinvestimento.
Neste caso integrarase en cada período a renda que proporcionalmente corresponda á duración deste en relación aos referidos sete anos.
2- Nos períodos impositivos nos que se amorticen os elementos patrimoniais nos que se materialice o reinvestimento, se se trata de bens amortizables.
Neste caso integrarase en cada período a renda que proporcionalmente corresponda ao valor da amortización fiscalmente deducible dos elementos patrimoniais en relación co seu prezo de adquisición ou custo de produción.
A elección dun ou doutro método debeu efectuarse no primeiro período impositivo no que proceda a incorporación da renda e manifestarase na declaración correspondente ao dito período.
Unha vez realizada a elección non se poderá modificar. En caso de non se realizar a elección aplicarase o primeiro método.
No recadro correspondente ao "Método de integración" deberá consignar a clave que en cada caso corresponda das seguintes:
1. Imputación, por partes iguais, nos 7 anos seguintes ao termo do período impositivo en que venza o prazo legalmente establecido para efectuar o reinvestimento.
Deberá adoptarse necesariamente este método de integración no caso de que o reinvestimento se materializase en elementos patrimoniais que non sexan amortizables.
2. Imputación nos períodos impositivos durante os cales se amorticen os elementos patrimoniais nos que se materialice o reinvestimento.
3. Ambos os métodos, no suposto de que o reinvestimento se materializase tanto en elementos amortizables coma en elementos non amortizables, ou ben en elementos que só en parte sexan amortizables.