Para a determinación do rendemento neto, deduciranse dos rendementos íntegros os gastos seguintes:
a) Todos os gastos necesarios para a obtención dos rendementos. Consideraranse gastos necesarios para a obtención dos rendementos, entre outros, os seguintes:
- Os xuros dos capitais alleos investidos na adquisición ou mellora do ben, dereito ou facultade de uso e aproveitamento do que procedan os rendementos, e demais gastos de financiamento, así como os gastos de reparación e conservación do inmoble.
O importe total que se pode deducir por estes gastos non poderá exceder para cada ben ou dereito da contía dos rendementos íntegros obtidos. O exceso poderá deducirse nos catro anos seguintes.
- Os tributos e recargas non estatais, así como as taxas e recargas estatais, calquera que sexa a súa denominación, sempre que incidan sobre os rendementos computados ou sobre o ben ou dereito produtor daqueles e non teñan carácter sancionador.
- Os saldos de dubidoso cobramento nas condicións que se establezan regulamentariamente.
- As cantidades xeradas por terceiros como consecuencia de servizos persoais.
b) As cantidades destinadas á amortización do inmoble e dos demais bens cedidos con este, sempre que respondan á súa depreciación efectiva, nas condicións que regulamentariamente se determinen.
Tratándose de inmobles, enténdese que a amortización cumpre o requisito de efectividade se non excede do resultado de aplicar o 3 por 100 sobre o maior dos seguintes valores:
- O custo de adquisición (sen incluír o valor do solo).
- O valor catastral (sen incluír o valor do solo).
No suposto de rendementos derivados da titularidade dun dereito ou facultade de uso ou aproveitamento, será igualmente deducible en concepto de depreciación, co límite dos rendementos íntegros, a parte proporcional do valor de adquisición satisfeito, nas condicións que regulamentariamente se determinen.