EXENCIÓN PARA OS RENDEMENTOS PERCIBIDOS POR TRABALLOS REALIZADOS NO ESTRANXEIRO (art. 7.p) da lei e 6 do regulamento)

 

Están exentos do imposto os rendementos do traballo percibidos por traballos efectivamente realizados no estranxeiro, cos seguintes requisitos:

 

1-   Que os ditos traballos se realicen para unha empresa ou entidade non residente en España ou un establecemento permanente radicado no estranxeiro.

En particular, cando a entidade destinataria dos traballos estea vinculada coa entidade empregadora do traballador ou con aquela na que preste os seus servizos, entenderase que os traballos se realizaron para a entidade non residente cando, de acordo co previsto no parágrafo 5 do artigo 16 do texto refundido da Lei do imposto sobre sociedades, se poida considerar que se prestou un servizo intragrupo á entidade non residente porque o citado servizo produza ou poida producir unha vantaxe ou utilidade á entidade destinataria.

 

2-   Que no territorio en que se realicen os traballos se aplique un imposto de natureza idéntica ou análoga á deste imposto e non se trate dun país ou territorio que fose cualificado regulamentariamente como paraíso fiscal. Considerarase cumprido este requisito cando o país ou territorio no que se realicen os traballos teña subscrito con España un convenio para evitar a dobre imposición internacional que conteña cláusula de intercambio de información.

 

3-   A exención terá un límite máximo de 60.100 euros anuais. Para o cálculo da retribución correspondente aos traballos realizados no estranxeiro, deberán tomarse en consideración os días que efectivamente o traballador estivo desprazado no estranxeiro, así como as retribucións específicas correspondentes aos servizos prestados no estranxeiro.

Para o cálculo do importe dos rendementos xerados cada día polos traballos realizados no estranxeiro, na marxe das retribucións específicas correspondentes aos citados traballos, aplicarase un criterio de repartimento proporcional tendo en conta o número total de días do ano.

 

4-   Esta exención será incompatible, para os contribuíntes destinados no estranxeiro, co réxime de excesos excluídos de tributación, en concepto de asignacións para gastos de manutención e estancia (art. 9 A.3.b) do regulamento), calquera que sexa o seu importe. O contribuínte poderá optar pola aplicación do réxime de excesos en substitución desta exención.