Na epígrafe C) da páxina 4 da declaración relacionaranse de forma separada os inmobles dos que o declarante fose propietario ou usufrutuario nalgún momento do exercicio, excluída a vivenda habitual e as prazas de garaxe (cun máximo de dúas), rochos e anexos adquiridos conxuntamente coa vivenda habitual.
Determinarase por cada inmoble a renda inmobiliaria imputada e/ou o rendemento neto do capital inmobiliario correspondente a este.
Mediante unha ventá de captura de datos faranse constar os datos identificativos de cada inmoble (titularidade, natureza, situación, uso ou destino e referencia catastral) e aqueles datos necesarios para determinar o rendemento xerado por este.
ENTIDADES EN ATRIBUCIÓN DE RENDAS (COMUNIDADES DE BENS, SOCIEDADES CIVÍS, HERDANZAS XACENTES)
As rendas derivadas de bens inmobles arrendados ou cedidos a terceiros por entidades en réxime de atribución de rendas (comunidades de bens, sociedades civís, herdanzas xacentes) deberán declararse, e relacionarse os inmobles, na epígrafe "Réximes especiais: réxime de atribución de rendas" (epígrafe F da páxina 8 da declaración).
A imputación de rendas inmobiliarias cuxa titularidade corresponda a entidades en atribución deberá declararse nesta epígrafe (epígrafe C da páxina 4 da declaración).
• DATOS IDENTIFICATIVOS DO INMOBLE
PROPIEDADE %
Indicarase, con dous decimais, a porcentaxe de participación na plena propiedade do inmoble, determinada de acordo coas normas sobre titularidade xurídica que resulten aplicables en cada caso.
No suposto de núa propiedade sobre o inmoble, non deberá indicar a porcentaxe de titularidade correspondente á núa propiedade.
USUFRUTO %
Indicarase, con dous decimais, a porcentaxe de participación no usufruto do inmoble, determinada de acordo coas normas sobre titularidade xurídica que resulten aplicables en cada caso.
NATUREZA
Indicarase se o inmoble ten natureza rústica ou urbana.
Só se incluirán os inmobles de natureza rústica que estivesen arrendados ou que xeren imputación de rendas inmobiliarias.
USO OU DESTINO DO INMOBLE
Consignarase unha das seguintes claves en función do uso ou destino do inmoble:
Clave 1. Arrendamento:
Inmobles que no exercicio 2014 estiveron arrendados, subarrendados ou cedidos a terceiros e soamente xeraron rendementos de capital inmobiliario.
Consignarase tamén a clave 1 cando o propietario percibise rendementos pola constitución ou cesión de dereitos ou facultades de uso ou aproveitamento sobre o inmoble (usufruto) e, ademais, durante todo o ano o inmoble non estivo á disposición dos seus titulares.
Clave 2. Á disposición dos seus titulares:
Inmobles cuxo único uso ou destino no exercicio 2014 foi á disposición dos seus titulares e soamente xeraron rendas inmobiliarias imputadas.
Clave 3. Á disposición dos seus titulares e arrendado:
Inmobles que no exercicio 2014 estiveron á disposición dos seus titulares e xeraron rendas inmobiliarias imputadas e, ademais, nalgún momento do exercicio estiveron arrendados xerando rendementos de capital inmobiliario.
Tamén se indicará esta clave cando o inmoble estivo á disposición dos seus titulares nalgún momento do exercicio e, ademais, xerou rendementos pola constitución ou cesión de dereitos ou facultades de uso ou aproveitamento sobre o inmoble (usufruto).
Neste caso, tamén se deberá indicar na ventá establecida para calcular a renda inmobiliaria imputada o número de días en que o inmoble estivo á disposición do propietario.
Clave 4. Arrendamento como inmoble accesorio:
Inmoble arrendado, subarrendado ou cedido a terceiros conxuntamente con outro inmoble considerado o obxecto principal do arrendamento, subarrendamento ou cesión cando non estea especificada a parte da contraprestación que lle corresponda individualmente a cada un deles. (Por exemplo, praza de garaxe arrendada conxuntamente cunha vivenda).
Clave 5. Á disposición dos seus titulares e arrendamento como inmoble accesorio:
Inmobles que no exercicio 2014 estiveron á disposición dos seus titulares e xeraron rendas inmobiliarias imputadas e, ademais, nalgún momento do exercicio estiveron arrendados como inmobles accesorios conxuntamente con outro inmoble considerado o obxecto principal do arrendamento. Neste caso, deberá cubrir a ventá "Inmoble á disposición dos seus propietarios ou usufrutuarios".
Clave 6. Vivenda na que, nos casos de separación ou divorcio, residen os fillos e o outro proxenitor por resolución xudicial:
Inmoble do que o contribuínte é total ou parcialmente titular, pero que constitúe a vivenda habitual do seu anterior cónxuxe por serlle asignado a este o seu uso exclusivo na resolución ou sentenza de separación legal ou divorcio.
Importante: nos supostos das claves 4 e 5 os rendementos derivados do arrendamento do inmoble accesorio deberán reflectirse conxuntamente cos rendementos do inmoble principal.
SITUACIÓN
Seleccionarase a clave que corresponda á situación do inmoble entre as seguintes:
Clave 1. Inmoble con referencia catastral situado en calquera punto do territorio español, excepto País Vasco e Navarra.
Clave 2. Inmoble situado na Comunidade Autónoma do País Vasco ou na Comunidade Foral de Navarra.
Clave 3. Inmoble en calquera das situacións anteriores pero sen referencia catastral.
Clave 4. Inmoble situado no estranxeiro.
REFERENCIA CATASTRAL
Recollerase nesta epígrafe a referencia catastral do inmoble que consta no recibo do imposto de bens inmobles que corresponde a este.
• DATOS SOLICITADOS PARA O CÁLCULO DA RENDA INMOBILIARIA IMPUTADA
PORCENTAXE DO INMOBLE QUE ESTÁ Á DISPOSICIÓN DO PROPIETARIO OU USUFRUTUARIO
No suposto de que só unha parte do inmoble do que o contribuínte é titular estea á disposición deste (por exemplo, por encontrarse en parte cedido, arrendado ou afecto a unha actividade económica), deberá indicar, expresada con dous decimais, a porcentaxe que representa a superficie do inmoble que estea á súa disposición con respecto á superficie total.
VALOR CATASTRAL
Consignarase, como regra xeral, o valor catastral dos inmobles.
Se na data de xeración do imposto o inmoble carecese de valor catastral ou este non lle fose notificado ao titular, consignarase o 50 por 100 do valor polo que se deba computar para os efectos do imposto sobre o patrimonio.
O valor para os efectos do imposto sobre o patrimonio será nestes casos o maior dos dous seguintes:
- Valor, contraprestación ou prezo de adquisición do inmoble.
- Valor comprobado pola Administración para os efectos doutros tributos.
REVISADO SI/NON
Deberá indicarse nesta epígrafe se o inmoble ten valor catastral revisado ou non, indicando "SI" naqueles cuxo valor catastral fose revisado a partir do 1 de xaneiro de 1994 e "NON" nos restantes.
NOTA: se na data de xeración do imposto o inmoble carecese de valor catastral ou este non lle fose notificado ao titular, deberá indicar nesta epígrafe "SI".
NÚMERO DE DÍAS QUE O INMOBLE ESTÁ Á DISPOSICIÓN DO TITULAR
Cando non se fose titular do inmoble (ou do dereito real de uso ou aproveitamento sobre este) durante todo o ano natural, ou cando parte do exercicio estivese en construción ou por razóns urbanísticas non fose susceptible de uso, indicarase o número de días en que se dispuxo da titularidade ou en que o inmoble estivo en condicións de utilización durante o ano 2014.
• DATOS SOLICITADOS PARA O CÁLCULO DO RENDEMENTO NETO DE CAPITAL INMOBILIARIO
Abrirase unha ventá de captura de datos na que deberá facilitar a seguinte información:
TIPO DE RENDEMENTO
Deberá seleccionar unha das seguintes claves:
1. Rendementos por arrendamento de inmobles destinados a vivenda con dereito á redución do 60 por 100.
2. Rendementos por arrendamento de inmobles destinados a vivenda con dereito á redución do 100 por 100.
3. Outros rendementos distintos dos anteriores.
ARRENDAMENTOS DE BENS INMOBLES DESTINADOS A VIVENDA
• Redución por arrendamento de vivendas
Nos supostos de arrendamento de bens inmobles destinados a vivenda, o rendemento neto reducirase nun 60 por 100.
• Suposto especial: arrendatarios con idades entre 18 e 30 anos
Cando o arrendatario teña unha idade comprendida entre 18 e 30 anos (o arrendatario ha de ter cumpridos os 18 anos e non ter cumpridos aínda os 30) e cumpra o resto dos requisitos esixidos, o rendemento neto poderá reducirse nun 100 por 100.
A idade do arrendatario ampliarase ata a data en que cumpra 35 anos cando o contrato de arrendamento se realizase con anterioridade ao 1 de xaneiro de 2011 co dito arrendatario.
Se a idade esixida só se tivese durante parte da vixencia do contrato no ano, poderá aplicarse a redución do 100 por 100 sobre a parte do rendemento neto xerado ata esa data (ingresos menos gastos producidos ata esa data).
Polo tanto:
A) Se hai un único arrendatario que cumpre os requisitos anteriormente citados:
- Se ten a idade esixida durante todo o tempo que estivese vixente o contrato no ano, indicaranse os datos nunha soa columna e consignarase a clave 2.
- Se ten a idade esixida durante parte da vixencia do contrato durante o ano, indicaranse nunha columna os rendementos íntegros e os gastos deducibles durante ese período. O rendemento neto correspondente ao período en que non cumpra os requisitos indicarase noutra columna distinta e consignarase en "Tipo de rendemento" a clave 1.
B) Cando existan varios arrendatarios dunha mesma vivenda e uns xeren o dereito á redución do 100 % e outros á do 60 %, indicaranse en distintas columnas os rendementos netos sobre os que proceda aplicar cada unha das citadas reducións. Para eses efectos, os ingresos e gastos distribuiranse en proporción ao número de arrendatarios que orixinen o dereito a cada unha das citadas reducións.
Por exemplo, se existise un arrendatario que xere o dereito á redución do 100 % e outro á redución do 60 %, abrirase unha columna para cada un deles, indicando a metade dos ingresos e gastos en cada columna.
ARRENDAMENTOS A FAMILIARES
No suposto de que o arrendatario do ben inmoble sexa o cónxuxe ou un parente, incluídos os afíns, ata o terceiro grao inclusive, o rendemento neto total non poderá ser inferior ao que resulte de aplicar as regras da epígrafe “IMPUTACIÓN DE RENDAS INMOBILIARIAS”.
Para estes efectos deberá indicar SI ou NON no recadro establecido na ventá de captura de datos.
IMPORTANTE: se existisen varios arrendatarios, subarrendatarios, adquirentes ou cesionarios e non todos fosen familiares, deberán reflectirse en distinta columna os datos relativos aos rendementos correspondentes a familiares e ao resto.
INGRESOS E GASTOS
Para os efectos de calcular o rendemento neto, deberá indicar os ingresos íntegros e gastos deducibles.
Suposto especial: xuros e gastos de conservación e reparación. Os xuros dos capitais alleos investidos na adquisición ou mellora do ben, dereito ou facultade de uso ou aproveitamento do que procedan os rendementos e demais gastos de financiamento, e os gastos de conservación e reparación deberán indicarse no recadro correspondente da ventá. O importe total que se pode deducir por estes gastos non poderá exceder, para cada ben ou dereito, da contía dos rendementos íntegros obtidos. O exceso sobre este límite será trasladado polo programa ao recadro 063 do modelo de declaración.
Así mesmo, se por aplicación do anterior límite citado quedou pendente de deducir algunha cantidade nos exercicios 2010, 2011, 2012 e 2013, deberá indicala na epígrafe correspondente da ventá. O importe total que se pode deducir non poderá exceder, para cada ben ou dereito, conxuntamente cos gastos polo mesmo concepto do propio exercicio da contía dos rendementos íntegros obtidos. O programa aplicará o límite citado.
REDUCIÓN POR RENDEMENTOS IRREGULARES
No suposto de que o rendemento teña un período de xeración superior a dous anos ou fose obtido de forma notoriamente irregular no tempo, deberá indicar o importe da redución (40 % da diferenza entre a totalidade dos ingresos íntegros irregulares e os gastos que, así mesmo, teñan natureza irregular). A redución non poderá exceder do 40 % do rendemento neto irregular, unha vez aplicada, se é o caso, a redución por arrendamento de vivenda.
RETENCIÓNS
Consignarase tamén o importe total das retencións que, se é o caso, fosen practicadas polo arrendatario.
RENDEMENTO MÍNIMO COMPUTABLE NO SUPOSTO DE ARRENDAMENTO A FAMILIARES
Cando o arrendatario ou subarrendatario, adquirente ou cesionario sexa o cónxuxe ou un parente do contribuínte, incluídos os afíns, ata o terceiro grao inclusive, o rendemento neto total computable non poderá ser inferior ao importe que resulte de aplicar a porcentaxe do 2 por 100 ao valor catastral deste (ou a porcentaxe do 1,1 por 100 se o dito valor foi revisado ou modificado con efectos posteriores ao 01-01-1994). No caso de que non tivese valor catastral, non poderá ser inferior ao resultado de aplicar o 1,1 por 100 sobre o 50 por 100 do valor polo que o inmoble se deba computar para os efectos do imposto sobre o patrimonio.
Polo tanto, tratándose dun arrendamento aos familiares citados, deberá indicar neste recadro o rendemento mínimo computable.