Considérase que unha empresa é de reducida dimensión cando o importe neto da cifra de negocios do ano anterior fose inferior a 10 millóns de euros.
Se se iniciase a actividade no ano anterior, o importe neto da cifra de negocios elevarase ao ano.
Se a actividade se iniciou no ano 2014, atenderase ao importe da cifra de negocios do propio exercicio 2014.
Para determinar o importe neto da cifra de negocios terase en conta o conxunto das actividades económicas exercidas polo contribuínte.
Cando unha persoa física por si soa ou conxuntamente co cónxuxe ou outras persoas físicas unidas por vínculos de parentesco en liña directa ou colateral, consanguínea ou por afinidade, ata o segundo grao inclusive, se encontren con relación a outras entidades das que sexan socios nalgún dos casos a que se refire o artigo 42 do Código de comercio, o importe neto da cifra de negocios referirase ao conxunto de persoas e entidades pertencentes ao grupo.
NOTA:
A partir do 1 de xaneiro de 2011, os incentivos fiscais establecidos para as empresas de reducida dimensión tamén serán de aplicación nos tres períodos impositivos inmediatos e seguintes a aquel período impositivo en que a empresa alcance a referida cifra de negocios de 10 millóns de euros, sempre que esta cumprise as condicións para ser considerada como de reducida dimensión tanto naquel período coma nos dous períodos impositivos anteriores a este último.
Igualmente será aplicable o establecido no parágrafo anterior cando a dita cifra de negocios se alcance como consecuencia de que se realizase unha operación das reguladas no capítulo VIII do título VII da Lei do imposto sobre sociedades, sempre que a empresa que realizase tal operación cumpra as condicións para ser considerada como de reducida dimensión tanto no período impositivo en que se realice a operación coma nos dous períodos impositivos anteriores a este último.
BENEFICIOS FISCAIS
As empresas de reducida dimensión poden beneficiarse para determinados elementos dun réxime especial de amortización:
A) Liberdade de amortización
1- Para investimentos xeradores de emprego, na forma e condicións establecidas no artigo 109 da Lei do imposto sobre sociedades.
2- Para investimentos de escaso valor: elementos do inmobilizado material novos cuxo valor unitario non exceda de 601,01 euros, ata o límite de 12.020,24 euros, por período impositivo (art. 110 Lei do imposto sobre sociedades).
B) Amortización acelerada
1- Os elementos novos do inmobilizado material e dos investimentos inmobiliarios, así como os elementos do inmobilizado intanxible, que se puxesen á disposición do contribuínte nun período impositivo en que a actividade teña a consideración de empresa de reducida dimensión, poderán amortizarse multiplicando por 2 o coeficiente de amortización lineal máximo previsto nas táboas de amortización oficialmente aprobadas (art. 111 Lei do imposto sobre sociedades).
2- Os elementos do inmobilizado material e dos investimentos inmobiliarios afectos a explotacións económicas nos que se materialice o reinvestimento do importe total obtido na transmisión onerosa de elementos do inmobilizado material e dos investimentos inmobiliarios, tamén afectos a explotacións económicas, poderán amortizarse en función do coeficiente que resulte de multiplicar por 3 o coeficiente de amortización lineal máximo previsto nas táboas de amortización oficialmente aprobadas, nas condicións establecidas no artigo 113 da Lei do imposto sobre sociedades.
C) Arrendamento financeiro (art. 115.6 da Lei do imposto sobre sociedades)
En relación cos bens adquiridos segundo o réxime especial de arrendamento financeiro, considérase gasto deducible a parte das cotas que corresponda á recuperación do custo dos bens amortizables, co límite do triplo do coeficiente de amortización lineal segundo táboas de amortización oficialmente aprobadas. O exceso será deducible nos períodos impositivos sucesivos, respectando igual límite.
D) Perdas por deterioración dos créditos por posibles insolvencias de debedores (art. 112 da Lei do imposto sobre sociedades)
Ademais, os contribuíntes que determinen o rendemento da súa actividade no réxime de estimación directa poderán deducir a perda por deterioración dos créditos para a cobertura do risco derivado das posibles insolvencias ata o límite do 1 por 100 sobre os debedores existentes no momento da conclusión do período impositivo, nas condicións establecidas no artigo 112 da Lei do imposto sobre sociedades.