ELEMENTOS PATRIMONIAIS UTILIZADOS PARA NECESIDADES PRIVADAS DE FORMA ACCESORIA E NOTORIAMENTE IRRELEVANTE (art. 22.4 do regulamento)

 

Consideraranse utilizados para necesidades privadas de forma accesoria e notoriamente irrelevante os bens do inmobilizado adquiridos e utilizados para o desenvolvemento da actividade económica que se destinen ao uso persoal do contribuínte en días ou horas inhábiles durante os cales se interrompa o exercicio da dita actividade.

O disposto no parágrafo anterior non será de aplicación aos automóbiles de turismo e os seus remolques, ciclomotores, motocicletas, aeronaves ou embarcacións deportivas ou de recreo, salvo os seguintes supostos:

a    Os vehículos mixtos destinados ao transporte de mercadorías.

b    Os destinados á prestación de servizos de transporte de viaxeiros mediante contraprestación.

c    Os destinados á prestación de servizos de ensino de condutores ou pilotos mediante contraprestación.

d    Os destinados aos desprazamentos profesionais dos representantes ou axentes comerciais.

e    Os destinados a ser obxecto de cesión de uso con habitualidade e onerosidade.

 

Para estes efectos, consideraranse automóbiles de turismo, remolques, ciclomotores e motocicletas os definidos como tales no anexo do Real decreto lexislativo 339/1990, do 2 de marzo, polo que se aproba o texto articulado da lei sobre tráfico, circulación de vehículos a motor e seguridade viaria, así como os definidos como vehículos mixtos no citado anexo e, en todo caso, os denominados vehículos todo terreo ou tipo "jeep".