Incluiranse nesta epígrafe os rendementos obtidos pola participación nos fondos propios de calquera tipo de entidade.
Quedan incluídos dentro desta categoría os seguintes rendementos, en diñeiro ou en especie:
1- Os dividendos, primas de asistencia a xuntas e participacións nos beneficios de calquera tipo de entidade.
2- Os rendementos procedentes de calquera clase de activos, excepto a entrega de accións liberadas que, estatutariamente ou por decisión dos órganos sociais, faculten para participar nos beneficios, vendas, operacións, ingresos ou conceptos análogos dunha entidade por causa distinta da remuneración do traballo persoal.
3- Os rendementos que deriven da constitución ou cesión de dereitos ou facultades de uso ou aproveitamento, calquera que sexa a súa denominación ou natureza, sobre os valores ou participacións que representen a participación nos fondos propios da entidade.
4- Calquera outra utilidade, distinta das anteriores, procedente dunha entidade pola condición de socio, accionista, asociado ou partícipe.
5- A distribución da prima de emisión de accións ou participacións e a redución de capital que teña por finalidade a devolución de achegas (art. 33.3.a) da lei). Nestes casos o importe obtido minorará, ata a súa anulación, o valor de adquisición das accións ou participacións afectadas e só o exceso que, se é o caso, resulte tributará como rendemento de capital mobiliario. Non obstante, se a redución de capital procede de beneficios non distribuídos, tributarán en concepto de capital mobiliario (parágrafo 1 do artigo 25.1 a) ) a totalidade das cantidades percibidas, sen que sexa aplicable o réxime de excesos. Para estes efectos, considerarase que as reducións de capital, calquera que sexa a súa finalidade, afectan en primeiro lugar a parte do capital social que non proveña de beneficios non distribuídos, ata a súa anulación.
6- A partir do 23 de setembro de 2010, nos supostos de redución de capital de sociedades de investimento de capital variable que teña por finalidade a devolución de achegas, o importe desta ou o valor normal de mercado dos bens ou dereitos percibidos, que se cualificará como rendemento do capital mobiliario do artigo 25.1 a) da lei, co límite da maior das seguintes contías:
– O aumento do valor liquidativo das accións desde a súa adquisición ou subscrición ata o momento da redución de capital social.
– Cando a redución de capital proceda de beneficios non distribuídos, o importe dos ditos beneficios. Para estes efectos, considerarase que as reducións de capital, calquera que sexa a súa finalidade, afectan, en primeiro lugar, a parte do capital social que proveña de beneficios non distribuídos, ata a súa anulación.
O exceso sobre este límite minorará o valor de adquisición das accións afectadas ata a súa anulación. Pola súa vez, o exceso que puidese resultar integrarase como rendemento do capital mobiliario procedente da participación nos fondos propios de calquera tipo de entidade, na forma prevista para a distribución da prima de emisión.
En ningún caso resultará de aplicación a exención de 1.500 euros aos rendementos regulados neste número.
7- A totalidade do importe obtido pola distribución da prima de emisión de accións de sociedades de investimento de capital variable sen que resulte de aplicación a minoración do valor de adquisición das accións previsto no artigo 25.1 e) da lei.
8- A exención non resultará de aplicación aos dividendos procedentes de sociedades anónimas cotizadas de investimento no mercado inmobiliario (SOCIMI).
IMPORTANTE
Os dividendos e participacións en beneficios a que se refiren os parágrafos 1 e 2 anteriores estarán exentos co límite de 1.500 euros anuais. En declaracións conxuntas, o límite da exención será tamén de 1.500 euros anuais, sen que proceda multiplicar esta cantidade polo número de membros da unidade familiar perceptores de dividendos.
Esta exención non se aplicará aos dividendos e beneficios distribuídos polas institucións de investimento colectivo. Tampouco se aplicará aos procedentes de valores ou participacións adquiridas dentro dos dous meses anteriores á data en que aqueles se satisfixesen cando, con posterioridade a esta data, dentro do mesmo prazo, se produza unha transmisión de valores homoxéneos.
No caso de valores ou participacións non admitidos a negociación nalgún dos mercados secundarios oficiais de valores definidos na Directiva 2004/39/CE o prazo será dun ano.
En ningún caso será aplicable a exención de 1.500 euros aos rendementos citados nos puntos 6, 7 e 8 anteriores.
FORMA DE CUBRIR
A través dunha ventá de captura de datos farase constar a seguinte información, que figurará normalmente na certificación de rendementos que facilita a entidade bancaria depositaria dos títulos:
TIPO DE RENDEMENTO
Indicarase o tipo de rendemento seleccionando unha das seguintes claves:
Clave 1: os dividendos e participacións en beneficios aos que sexa aplicable a exención do artigo 7 y) da Lei do imposto.
Clave 2: resto de rendementos de capital mobiliario procedentes da participación en fondos propios.
ÍNTEGRO PERCIBIDO
Consignarase o importe íntegro percibido en concepto de dividendos ou participacións en beneficios de calquera tipo de entidade, sen descontar, se é o caso, o importe da exención do artigo 7 y). O programa aplicará esta exención ata o límite máximo de 1.500 euros anuais.
Na ventá indicarase a título informativo a contía sometida a tributación e o importe exento.
Se o rendemento se percibiu en especie, deberá computarse como ingreso íntegro o valor de mercado dos bens ou servizos recibidos. Ao dito valor sumaráselle o ingreso á conta, salvo que o seu importe fose repercutido ao perceptor da renda.
RETENCIÓNS
Recolleranse nesta epígrafe as retencións practicadas ou ingresos á conta efectuados sobre os dividendos e demais participacións en beneficios de entidades. O programa traslada estas cantidades ao recadro 591 da páxina 16 da declaración.
GASTOS DE ADMINISTRACIÓN E DEPÓSITO DE VALORES NEGOCIABLES (art. 25.1.a) da lei)
Para a determinación do rendemento neto, deduciranse dos rendementos íntegros exclusivamente os gastos de administración e depósito de valores negociables.
Para estes efectos, considéranse como gastos de administración e depósito aqueles importes que repercutan as empresas de servizos de investimento, entidades de crédito ou outras entidades financeiras que, de acordo coa Lei 24/1988, do 28 de xullo, do mercado de valores, teñan por finalidade retribuír a prestación derivada da realización por conta dos seus titulares do servizo de depósito de valores representados en forma de títulos ou da administración de valores representados en anotacións en conta.
Non serán deducibles as contías que supoñan a contraprestación dunha xestión discrecional e individualizada de carteiras de investimento, onde se produza unha disposición dos investimentos efectuados por conta dos titulares conforme os mandatos conferidos por estes.