DEDUCIÓN POR ACTUACIÓNS PARA A PROTECCIÓN E DIFUSIÓN DO PATRIMONIO HISTÓRICO ESPAÑOL E DAS CIDADES, CONXUNTOS E BENS DO PATRIMONIO MUNDIAL
Terán dereito a unha dedución na cota do 15 por 100 do importe dos investimentos e gastos que realicen para:
a) A adquisición de bens do patrimonio histórico español, realizada fóra do territorio español para a súa introdución dentro do dito territorio, sempre que os bens sexan declarados de interese cultural ou incluídos no Inventario xeral de bens mobles no prazo dun ano desde a súa introdución e permanezan en territorio español e dentro do patrimonio do titular durante polo menos catro anos.
A base desta dedución será a valoración efectuada pola Xunta de Cualificación, Valoración e Exportación de bens do patrimonio histórico español.
b) A conservación, reparación, restauración, difusión e exposición dos bens da súa propiedade que estean declarados de interese cultural conforme a normativa do patrimonio histórico do Estado e das comunidades autónomas, sempre e cando se cumpran as esixencias establecidas na citada normativa, en particular respecto dos deberes de visita e exposición pública dos ditos bens.
c) A rehabilitación de edificios, o mantemento e reparación dos seus tellados e fachadas, así como a mellora de infraestruturas da súa propiedade situados no contorno que sexa obxecto de protección das cidades españolas ou dos conxuntos arquitectónicos, arqueolóxicos, naturais ou paisaxísticos e dos bens declarados patrimonio mundial pola UNESCO situados en España.
A base desta dedución non poderá exceder do 10 por 100 da base liquidable do contribuínte (art. 69 da lei).