DECLARACIÓNS COMPLEMENTARIAS CON INCLUSIÓN DE XUROS DE MORA

-   Perda total ou parcial do dereito á exención por reinvestimento en vivenda habitual (art. 41 do regulamento)

Cando se perdese, total ou parcialmente, o dereito á exención por reinvestimento da ganancia patrimonial derivada da transmisión da vivenda habitual como consecuencia de non se ter efectuado finalmente o dito reinvestimento dentro do prazo establecido, ou ben por terse incumprido calquera outra das condicións que determinan o dereito ao mencionado beneficio fiscal.

En tal caso o contribuínte imputará a parte da ganancia non exenta ao ano da súa obtención, practicando autoliquidación complementaria, con inclusión dos xuros de mora, que se presentará no prazo que medie entre a data na que se produza o incumprimento e a finalización do prazo regulamentario de declaración correspondente ao período impositivo no que se produza o dito incumprimento.

 

-   Perda da exención de determinadas retribucións en especie (art. 43 do regulamento)

Cando se perdese, por parte dos traballadores en activo das sociedades, o dereito a non considerar como retribución en especie a percepción de accións ou participacións da sociedade para a que traballan, ou ben doutra sociedade do grupo, nos termos e condicións establecidos no artigo 43 do Regulamento do IRPF, como consecuencia de se incumprir o prazo de mantemento das ditas accións ou participacións previsto no citado artigo.

O incumprimento deste prazo motivará a obriga de presentar unha autoliquidación complementaria, cos correspondentes xuros de mora, no prazo que medie entre a data na que se incumpra o requisito e a finalización do prazo regulamentario de declaración correspondente ao período impositivo no que se produza o dito incumprimento.

 

-   Disposición de dereitos consolidados de sistemas de previsión social (art. 58.8 da lei)

Nos casos de disposición, total ou parcial, de dereitos consolidados, así como dos dereitos económicos que se deriven dos distintos sistemas de previsión social previstos no art. 58 da lei en supostos distintos dos previstos para a disposición de dereitos consolidados dos plans de pensións, o contribuínte deberá repoñer as reducións na base impoñible indebidamente practicadas, practicando autoliquidacións complementarias, con inclusión dos xuros de mora.

 

-   Perda da exención por despedimento ou cesamento (arts. 1 e 73 do regulamento)

Cando se produza a perda da exención da indemnización por despedimento ou cesamento do traballador no suposto de que, dentro dos tres anos seguintes ao despedimento ou cesamento, este volva prestar servizos á mesma empresa ou a outra empresa vinculada a aquela, deberá presentar autoliquidación complementaria, con inclusión dos xuros de mora, no prazo que medie entre a data na que volva prestar servizos e a finalización do prazo regulamentario de declaración correspondente ao período impositivo no que se produza a dita circunstancia.

 

-   Recompra de elementos patrimoniais que orixinasen perdas computadas na declaración (art. 33.5, alíneas e) e g) da lei; art. 73.2 do regulamento)

Cando o contribuínte realice a adquisición dos elementos patrimoniais ou dos valores ou participacións homoxéneos con posterioridade á finalización do prazo regulamentario de declaración do período impositivo no que computou a perda patrimonial derivada da transmisión, deberá presentar autoliquidación complementaria, con inclusión dos xuros de mora, no prazo que medie entre a data na que se produza a adquisición e a finalización do prazo regulamentario de declaración correspondente ao período impositivo no que se realice a dita adquisición.

 

-   Perda do dereito á redución do rendemento neto das actividades económicas por mantemento ou creación de emprego (DA vixésimo sétima da Lei IRPF)

 

Cando se incumpra o requisito referente ao cadro de persoal medio establecido na DA vixésimo sétima da LIRPF, presentarase unha autoliquidación complementaria, con inclusión de xuros de mora, no prazo que media entre a data en que se incumpra o requisito e a finalización do prazo regulamentario de declaración correspondente ao período impositivo en que se produza o dito incumprimento.