En xeral, os contribuíntes que realicen actividades económicas teñen dereito aos incentivos e estímulos ao investimento empresarial establecidos na normativa do imposto sobre sociedades, con excepción da dedución prevista no artigo 42 da dita lei (dedución por reinvestimento do importe obtido na transmisión onerosa de determinados elementos patrimoniais afectos ao exercicio de actividades económicas), con igualdade de límites e porcentaxes de dedución.
Estes incentivos só serán de aplicación aos contribuíntes en réxime de estimación obxectiva cando así se estableza expresamente.
Non obstante, as cantidades pendentes de deducir procedentes de investimentos realizados en exercicios anteriores nos que o rendemento se determinase no réxime de estimación directa, poderán deducirse nesta declaración e ata a terminación do prazo legal concedido para iso, aínda que os suxeitos pasivos titulares estean acollidos neste exercicio ao réxime de estimación obxectiva.
Os investimentos realizados por entidades en réxime de atribución de rendas (sociedades civís, herdanzas xacentes, comunidades de bens etc.) que determinen os seus rendementos netos en estimación directa poderán ser obxecto de dedución por cada un dos socios, herdeiros ou comuneiros en proporción á súa participación no beneficio da entidade (art. 8 da lei).